Prej datës 1 janar 2019 të gjitha nënat e fëmijëve të porsalindur do të përfitojnë bonusin e bebes, i cili është 40 mijë lekë për lindjen e fëmijës së parë, 80 mijë lekë për fëmijën e dytë dhe 120 mijë lekë për fëmijëne tretë e në vijim.
Ndërkaq, referuar Vendimit të Këshillit të Ministrave, shumat përkatëse do të mund të tërhiqen në 2 këste. Më konkretisht, vlera më e madhe do të mund të tërhiqet nga nëna menjëherë pas lëshimit nga institucionet e shërbimit spitalor të dokumentit “certifikatë asistence në lindje”.
Ndërkohë që, diferenca e mbetur prej 5 mijë lekësh do të përfitohet pas përfundimit të procedurave të regjistrimit të fëmijës në Regjistrin Kombëtar të Gjendjes Civile.
Për sa i takon procedurave të përfitimit, do të jetë nëpunësi i gjendjes civile, i atashuar pranë institucioneve të shërbimit spitalor ku kryhet lindja, që do të kryejë veprimet e verifikimit online të statusit të nënës dhe që regjistron fëmijën e lindur në Regjistrin Kombëtar të Gjendjes Civile.
Ndërkohë që, pas regjistrimit kryen verifikimet e nevojshme për përcaktimin e masës së bonusit, në varësi të numrit të fëmijëve. Masa e ndihmës së menjëhershme financiare jepet në formën e një çeku, në një nga bankat e nivelit të dytë, që mbetet për t’u përcaktuar në vijim. Bonusi do të jepet edhe për edhe nënat shtetase shqiptare për fëmijë të lindur jashtë vendit.
