Ilir Meta u bë i pari president në historinë e Shqipërisë së pluralizmit politik që i kthen Kuvendit buxhetin e shtetit duke mos e dekretuar atë.
Presidenti e bëri këtë veprim i ndikuar nga protesta e studentëve, të cilët kërkonin që buxheti për arsimin të rritej. Kreu i shtetit ja nisi Kuvendit për rishqyrtim ligjin e buxhetit, duke kërkuar që të reflektohej sa të ishte e mundur mbi kërkesat e studentëve.
Por burime pranë mazhorancës bëjnë me dije se ky dekret do të rrëzohet. Kryetari i Kuvendit, Gramoz Ruci ja ka përcjellë këtë dekret për shqyrtim, komisionit përgjegjës, atij të Ekonomisë dhe Financave.
Ky komision do ta shqyrtojë brenda javës së ardhshme dhe të premten, në 21 dhjetor do të rrëzohet në seancë plenare me argumentin se buxheti është i balancuar.
Por kërkesat e studentëve kanë sjellë në Kuvend dhe disa propozime të tjera. Dy amendamente janë bërë nga LSI dhe ato do t’u nënshtrohen komisioneve parlamentare, e në fund fati pritet të jetë siç e njoftoi dhe vetë Edi Rama.
“Janë bërë për tu rrëzuar”.
Ndërkohë, këtë të diel, deputeti demokrat Luciano Boci ka propozuar ndryshime të tjera ligjore që sipas tij, plotësojnë kërkesat e studentëve.
Boci kërkon që buxheti për ministrinë e arsimit të bëhet 5 % e prodhimit të brendshëm bruto, sikundërse kërkojnë edhe studentët.
Edhe kjo nismë do t’i nënshtrohet procedurës parlamentare.
