Euro ka zbritur të enjten në nivelin 123.95 lekëve. Sipas kursit zyrtar të këmbimit të Bankës së Shqipërisë, kjo është hera e parë që nga janari i vitit 2009, që euro bie poshtë vlerës së 124 lekëve.
Tashmë është e qartë se tregu ka një ofertë të lartë të monedhës europiane, e ndikuar nga përmirësimi i bilancit tregtar, sasitë ende të mëdha të investimeve të huaja direkte dhe sezonit pozitiv turistik.
Një burim tjetër valute mund të jetë edhe eurobondi i emetuar dy muaj më parë nga qeveria shqiptare, në momentin që ato konvertohen në lekë për të mbuluar shpenzimet qeveritare.
Rënia e euros, megjithatë, gjithnjë e më shumë mund të ndikohet nga faktori psikologjik. Pritshmëria e se kursi euro-lek do të bjerë më tej i shtyn shumë agjentë të tregut që të shesin euro, para se monedha europiane të zhvlerësohet më tej. Kjo rrit ofertën e euros, duke sjellë pikërisht dobësimin e mëtejshëm të saj.
Megjithëse zyrtarisht Banka e Shqipërisë nuk e ka mbyllur programin e ndërhyrjes në tregun valutor, javët e fundit as kjo prani nuk ka mjaftuar për ta frenuar zhvlerësimin e euros.
Në deklaratën e misionit të fundit, Misioni i Fondit Monetar Ndërkombëtar i pati kërkuar Bankës së Shqipërisë të ndërpriste gradualisht ndërhyrjen në tregun valutor. Ndoshta kjo ka bërë që Banka Qendrore të tërhiqet dhe t’i lërë vend mekanizmave të tregut.
