Asteroidet janë të pasura me ujë, bazuar në studimin e karakteristikave të mineraleve të tyre.
Zbulimi i këtij elementi të rëndësishëm për jetën në këta shkëmbinj kozmikë u bë nga një grup astronomësh japonezë të Universitetit të Kobe, Universiteti i Tokios dhe Agjencisë Hapësinore Japoneze, Jaxa.
Rezultatet e këtij studimi u publikuan në revistën “Publications of the Astronomical Society of Japan”.
Astronomët kanë kërkuar për ujë në 66 asteroide të ndryshme, falë satelitit japonez “Akari”, i lëshuar në vitin 2006 dhe i pajisur me një kamera me rreze infra të kuqe.
“Ky zbulim do të ndihmojë që të kuptohet shpërndarja e ujit në Sistemin Diellor, evoluimin e asteroideve dhe origjinën e ujit në Tokë”, shpjegojnë astronomët.
Për më tepër, ky studim konfirmon teorinë sipas të cilës shumë asteroide janë krijuar nga bashkimi i gurëve me ujë të ngrirë.
