Deklarata e zëdhënëses së BE-së, Maja Kocijançiç që në dialogun final Kosovë-Serbi të futet edhe Trepçja, ka sjellë edhe reagimin e fortë të ish-kryenegociatores së bisedimeve me Serbinë, Edita Tahiri.
Tahiri është shprehur se e kundërshton fuqishëm këtë ide, të cilën e cilëson si skandaloze.
Gjithashtu Tahiri ka hedhur akuza të forta kundër Mogherinit, duke thënë se kjo e fundit po mban anën e Serbisë.
“E kundërshtoj fuqishëm këtë deklaratë skandaloze dhe luftë nxitëse nga ana e Zyrës së Mogherinit, që tregon se zonja Mogherini ka marrë anën e Serbisë, duke dhe humbur besueshmërinë për të qenë ndërmjetësuese të paanshëm i Dialogut të Brukselit. Ky nuk është qëndrim i BE-së, por vetëm i disa zyrtareve që janë në rrugë të gabueshme”, citohet të ketë thënë ish-kryenegociatorja.
Ajo ka shtuar se Mogerhini nuk po i shërben BE-së.
“Mendoj se pyetja hipotetike duhet kujt po i shërben Mogherini, sepse është e qartë se nuk po i shërben BE dhe as nuk po i mbron parimet e BE për Ballkanin Perëndimor ku 6 shtete përfshirë këtu dhe Kosovën janë në rrugën e Integrimit Evropian”, ka thënë Tahiri.
Edita Tahiri ka shtuar se është alarmante që zyra e Mogerhinit nuk respekton qëndrimet e shteteve që e kanë njohur Kosovën.
“Nuk duhet të harrojnë as Mogherini as Kocijançiç se 23 vende anëtare të Bashkimit Evropian kanë njohur shtetin e Kosovës, ndërsa vetëm 5 nuk e kanë njohur. Është alarmante që zyra e Mogherinit nuk respekton qëndrimet e shteteve liderë të Evropës, si Gjermania, Franca, Britania që kanë shprehur qëndrim të prerë kundër ndryshimit të kufijve të Kosovës në raport me Serbinë”, është shprehur Tahiri.
