Imazhet satelitore të një objekti afër Phenianit tregojnë se Koreja e Veriut po përgatitet të lëshojë një raketë ose një satelit.
Veprimet po kryhen në një vend të njohur si Sanumdong, ku Koreja e Veriut mblodhi shumicën e raketave.
E gjitha kjo vjen pas njoftimeve të kësaj jave se vendi i nisjes së raketave të Koresë së Veriut në Sohae ishte rindërtuar. Puna për të çmontuar Sohae filloi vitin e kaluar, por u ndalua pasi bisedimet me SHBA u zvarritën. Sohae ka qenë struktura kryesore e nisjes së satelitit të Koresë së Veriut që nga viti 2012. Ajo gjithashtu është përdorur për testimin e motorëve për raketat e afta për të arritur në SHBA.
Automjetet e mëdha janë parë duke lëvizur rreth Sanumdong, aktivitet që në të kaluarën tregonte se Koreja e Veriut po përatitej të lëshonte ndonjë raketë. Imazhet satelitore u publikuan nga rrjeti i radios publike amerikane NPR.
Foto e marrë nga BBC
Të premten, Presidenti i SHBA Donald Trump tha se do të ishte i zhgënjyer nëse Koreja e Veriut do të rifillonte testimin e armëve. “Do të isha i habitur në një mënyrë negative, por do të shohim se çfarë do të ndodhë”, tha ai. “Do të isha shumë i zhgënjyer nëse do të shoh testimin”.
Megjithatë presidenti Trump përsëriti se beson në raportin e tij të mirë me udhëheqësin e Koresë Veriore, Kim Jong-un, pavarësisht dështimit të samitit të tyre javën e kaluar.
Një takim i shumëpritur midis dy udhëheqësve në kryeqytetin vietnamez javën e kaluar përfundoi pa një marrëveshje, duke qenë se sipas Trumpit, Koreja e Veriut ishte e gatshme të kufizonte programin e saj bërthamor por vetëm nëse do të hiqeshin plotësisht sanksionet.
Foto e marrë nga BBC
Megjithatë Trump pranoi se paten “takime shumë të mira dhe konstruktive”.
Këshilltari i Sigurisë Kombëtare i SHBA, John Bolton ka thënë se Koreja e Veriut mund të përballet me më shumë sanksione nëse nuk ka përparim në denuklearizim.
Takimi i parë historik midis Trump dhe Kim në 2018 në Singapor prodhoi një marrëveshje të formuluar në mënyrë të paqartë mbi “denuklearizimin”, por shumë pak përparim.
VAZHDO TË LEXOSH MË TEPËR PËR TEMËN
Koreja e Veriut po rindërton vendin e nisjes së raketave
Koreja e Veriut “kërcënon” se do të rinisë programin bërthamor
Edhe në 2019, gjithë vëmendja do të jetë tek Koreja e Veriut…
