Komisioni i Bashkimit Europian pritet të paraqesë në maj një rekomandim pozitiv për hapjen e negociatave të anëtarësimit për Shqipërinë dhe Maqedoninë e Veriut.
Këto deklarata janë të Komisionerit për Zgjerimin, Johanes Hahn, i cili nga ana tjetër paralajmëron se mosnjohja e progresit të bërë nga vendet kandidate do të ketë pasoja dramatike për këto vende dhe për rajonin në tërësi.
Komisioneri i BE-së për Zgjerimin, Johanes Hahn shprehet i bindur se në fund të muajit maj Komisioni Europian do të paraqesë një rekomandim pozitiv për Shqipërinë dhe Maqedoninë e Veriut sipas kritereve të miratuara njëzëri nga shtetet anëtare.
Duke folur në një intervistë për agjencinë gjermane të lajmeve DPA, Hahn e quajti ekzemplare reformën në drejtësi që po ndërmerr Shqipëria.
“Shqipëria ka bërë progres shumë të mirë në raport me kriteret e pranuara nga shtetet anëtare. Reforma gjithëpërfshirëse në drejtësi është ekzemplare. Për më tepër, pritshmëritë legjitime të shqiptarëve duhet të vlerësohen nga shtetet e BE-së. Megjithatë, për shembull, përpjekjet për të luftuar korrupsionin dhe krimin e organizuar, në sektorë që shqetësojnë veçanërisht shtetet anëtare, duhet të rriten”, shtoi Hahn.
Komisioneri paralajmëroi se nëse BE-ja nuk eksporton vazhdimisht stabilitet tek fqinjët e afërt, atëherë do të importojë destabilitet.
Për sa i përket pasojave në rast se rekomandimi pozitiv i Komisionit nuk do të miratohet, Hahn ritheksoi se “bëhet fjalë për kredibilitetin e BE-së.
“Vetë shtetet anëtare vendosën qershorin si afatin për të vendosur hapjen e negociatave me Maqedoninë e Veriut dhe Shqipërinë. Shtyrja dhe mosnjohja e progresit objektiv të bërë nga vendet kandidate do të ketë pasoja dramatike për këto vende dhe rajonin në tërësi”, theksoi ai.
VAZHDO TË LEXOSH MË TEPËR PËR TEMËN
‘Kosova po pengon zbatimin e CEFTA-së’
