Kryeministri izraelit Benjamin Netanyahu me shumë mundësi do të fitojë një mandat të pestë qeverisës pas zgjedhjeve të djeshme parlamentare.
Rezultatet e zgjedhjeve tregojnë se partia e tij Likud dhe aleatë të saj të krahut të djathtë ndodhen në pozita më të mira për të formuar një qeveri koalicioni.
Në kushtet kur asnjë parti nuk ka fituar shumicën për të qeverisur e vetme, formimi i një koalicioni do të jetë i nevojshëm. Likud dhe aleatët e saj mund të përfundojnë me rreth 65 vende në parlamentin prej 120 anëtarësh.
Në orët pas përfundimit të votimit të dyja palët pretenduan fitoren.
Ndërsa numërimi i votave po shkon drejt fundit, Netanyahu u tha mbështetësve të tij se Likud kishte arritur një “fitore të jashtëzakonshme”. Ai tha se koalicioni i tij i mundshëm do të ishte një qeveri e krahut të djathtë dhe premtoi se do të ishte “kryeministër për të gjithë”.
Komentet janë në kundërshtim me apelin e tij drejtuar votuesve në ditët e fundit të fushatës kur ai tha se do të forconte bazën e tij konservatore, duke u zotuar të aneksojë vendbanime në Bregun Perëndimor. Një hap i tillë mund t’i jepte fund çdo shansi për të krijuar një shtet të pavarur palestinez krahas Izraelit.
Gantz e quajti zotimin e zotit Netanjahut “të papërgjegjshëm”. Ai tha se favorizon një “marrëveshje paqësore të mbështetur ndërkombëtarisht”. Gantz tha se partia e tij është një forcë për bashkimin e Izraelit dhe tha se ishte koha për të rrëzuar Netanyahun nga pushteti.
Nëse partia Likud do të formojë një koalicion qeverisës, Netanjahu do të ketë shanse për t’u bërë udhëheqësi më jetëgjatë në pushtet, duke ia kaluar themeluesit të vendit, David Ben-Gurion.
Por Netanyahu përballet gjithashtu me një hetim penal në vazhdim.
Në pritje të seancës dëgjimore gjyqësore, Prokurori i Përgjithshëm i Izraelit ka thënë se ka në plan të padisë Netanjahun për ryshfet, mashtrim dhe shkelje të besimit. Zoti Netanjahu e ka quajtur hetimin një “gjueti shtrigash”, duke i bërë jehonë shprehjes së mikut të tij të ngushtë, presidentit amerikan Donald Trump, i cili e përdorte atë për të përshkruar hetimin që po kryhej lidhur me fushatën zgjedhore të vitit 2016.
VAZHDO TË LEXOSH MË TEPËR PËR TEMËN
Rusi-Israel/ Takimi i parë pas “krizës”
