Gjatë ceremonisë së dhurimit të 37 mjeteve të blinduara nga SHBA për Shqipërinë, e ngarkuara me punë e SHBA në vendin tonë, Leyla Mosës-Ones gjatë fjalës së saj e cilësoi dhurimin e mjeteve si një ndihmë jo vetëm për vendin tonë, por edhe për Aleancën.
Moses-Ones gjithashtu vlerësoi rolin e Shqipërisë në rajon.
“Kjo aftësi e re e blinduar do të rrisë mbrojtjen e brendshme të Shqipërisë, do të forcojë krahun jugor të NATO-s dhe do të sigurojë fuqi vendimtare luftarake në NATO që mund të dislokohet në mbështetje të operacioneve globale. Ky është një tjetër shembull se si Shqipëria po rritet si një lider rajonal në Ballkan.
Nën drejtimin e shkëlqyer të ministres Xhaçka dhe gjeneral Kollçakut, komunikimi dhe bashkëpunimi midis forcave tona ushtarake nuk ka qenë kurrë më i fortë ndërsa shpërndarja e këtyre automjeteve shënon përfundimin e një faze të bashkëpunimit tonë“, tha Moses-Ones.
37 mjetet e blinduara dhuruar së fundmi, janë pjesë e paketës së ndihmës së qeverisë së Shteteve të Bashkuara të Amerikës për Forcat tona të Armatosura.
Mjetet e mbrojtura dhe rezistente ndaj pritave dhe kurtheve të minuara, kanë një ekuipazh prej 3-7 ushtarakësh.
