Policia e Shtetit i ka bërë thirrje të gjithë atyre personave që tentojnë të përhapin panik përmes njoftimeve false nëpër rrjete sociale, se do të ndiqen penalisht.
Në një deklaratë per mediat, Drejtori i Drejtorisë për Hetimin e Krimeve Ekonomike e Financiare në Policinë e Shtetit Lutfi Minxhozi deklaroi se në një faqe në rrjetet sociale ishte përhapur një lajm i pavërtetë, ku flitej për një numër viktimash në morgun e Tiranës, jetë të humbura nga tërmeti i 26 nëntorit. Mësohet se për këtë fakt, policia ka proceduar dy persona.
NJOFTIMI I POLICISE
Policia e Shtetit, në vijim të monitorimit të vazhdueshëm për zbulimin dhe goditjen e çdo rasti të abuzimeve me këtë situatë të fatkeqësisë natyrore, duke synuar jo vetëm sigurinë fizike të qytetarëve, por edhe garantimin e qetësisë dhe ndjenjës së sigurisë, po merr masa për parandalimin dhe ndëshkimin ligjor të gjithë personave, të cilët nëpërmjet njoftimeve të rreme në rrjetet sociale, përhapin panik me lajme destabilizuese.
Kështu, në Tiranë, janë proceduar penalisht shtetasit E. Dalliu, 29 vjeç banues në Tiranë dhe G. Çengeli, 39 vjeç banues në Tiranë, administratorë të një faqe në internet.
Këta shtetas, nëpërmjet faqes nën administrim të tyre, kanë lejuar publikimin e njoftimeve të rreme, të cilat mbjellin panik tek qytetarët. Konkretisht, kjo faqe në datën 28.11.2019 ka shpërndarë një lajmërim, në të cilin aludohet për një numër të madh viktimash të gjendur në morgun e Tiranës.
Menjëherë pas publikimit të njoftimit, nga strukturat e specializuara të hetimit të krimit kibernetik, krimit ekonomik e financiar dhe strukturat e hetimit Antiterror janë kryer veprimet procedurale për të dokumentuar publikimin e këtij njoftimi dhe njoftimeve të tjera të kësaj natyre.
Nga verifikimet e kryera rezultoi se ky njoftim ishte tërësisht i rremë dhe dashakeq duke synuar përhapjen e panikut e frikës tek qytetarët. Policia e Shtetit po monitoron çdo minutë dhe do të procedojë penalisht çdo person që do të publikojë lajme të rreme, të cilat përhapin panik tek qytetarët.
Në të njëjtën kohë, njoftojmë të gjithë qytetarët që të denoncojnë në numrin 112, Komisariatin Dixhital dhe në faqet zyrtare të Policisë së Shtetit në rrjetet sociale, për çdo njoftim të rremë që publikohet në rrjetet sociale i cili synon destabilizimin e qytetarëve. Policia e Shtetit fton median dhe qytetarët që për çdo situatë e cila mund të ngrejë dyshime ti drejtohen Policisë së Shtetit dhe institucioneve të tjera shtetërore për të marrë informacion zyrtar.
VAZHDO TË LEXOSH MË TEPËR PËR TEMËN
“Më i forti në dekada”, mediat e huaja raportojnë tërmetin tragjik
“Moment dramatik” Rama: Fatkeqësisht kemi jetë të humbura
