Arsimi profesional është një nga mundësitë drejt punësimit dhe rritjes ekonomike.Qeveria shqiptare po mbështet me politika të veçanta kualifikimin e fuqisë punëtore në përputhje me nevojat e tregut të punës.
Projekte të tilla si ndërtimi i aeroportit të Vlorës, apo hapja e disa fabrikave që prodhojnë sisteme kabllore apo pjesë të tjera për makinat në vendin tonë, ashtu si dhe investimet në sektorin e hidrokarbureve kërkojnë punonjës të kualifikuar.
Një nga objektivat e qeverisë është të rrisë numrin e të punësuarve pas diplomimit në shkollat e mesme profesionale në 46% të totalit të të diplomuarve nga 42% që llogaritet këtë vit.
Gjithashtu synohet dhe rritja e numrit të të diplomuarve në shkollat e mesme profesionale, nga 3.300 nxënës në 2019, në 3.600 nxënës në vitin 2022.
Vihet re një rritje e numrit të nxënësve që vijnë nga zonat rurale të cilët ndjekin studimet në shkollat e mesme profesionale, nga 40% e totalit në vitin 2019 në 55% e totalit në vitin 2022.
Numri i nxënësve në shkollat e arsimit profesional është rritur në mënyrë të ndjeshme, me rreth 3.4%, duke synuar një përshtatshmëri më të madhe me nevojat e tregut të punës dhe biznesit.
Aktualisht, numri i nxënësve në 35 shkollat e arsimit profesional në vend është rreth 20 mijë.