Nënkryetari i LDK, Agim Veliu, ka thënë se pa e definuar pozitën e Presidentit s’do të ketë marrëveshje me Vetëvendosjen për ndërtimin e Qeverisë. Çdo shtyrje e çështjes së definimit të pozitës së Shefit të Shtetit do ta rrezikonte koalicionin.
“Mendimi i të gjithëve dhe disponimi është që tani të definohen të gjitha përgjegjësitë që i kemi me Vetëvendosjen në koalicion, tani e jo më vonë. Sepse çdo gjë që lihet më vonë për diskutim rrezikon koalicionin në punën e tij të mëtejme”– tha Veliu.
Një ditë më parë, deputeti i LDK, Fatmir Rexhepi kërkoi të arrihet marrëveshje për Qeverinë ndërsa tha se Presidenti duhet të lihet për më vonë. Rexhepi deklaroi se edhe në organin më të lartë partiak ka thënë se s’ka alternativë tjetër përveç marrëveshjes me Vetëvendosjen. Agim Veliu këtë qëndrim të Rexhepit e sheh në kuadër të demokracisë dhe lirisë së mendimit në LDK.
LDK, prej se kanë përfunduar zgjedhjet, e ka bërë të qartë se pozita e Shefit të Qeverisë i takon partisë fituese. Ndërkaq, Isa Mustafa po vazhdon të kërkojë pozitën e Presidentit, Kryeparlamentarit dhe janë pajtuar me VV që të kenë pesë Ministri dhe Zëvendëskryeministrin e Parë.
LDK, bazuar në raportimet për marrëveshje, do të marrë Ministrinë e Mbrojtjes, atë të Infrastrukturës, Ministrinë e Zhvillimit Ekonomik dhe sektorin e arsimit. Albin Kurti është pajtuar të marrë financat, diplomacinë, shëndetësinë, drejtësinë, ambientin dhe bujqësinë. Kulturën dhe Kthimin ua kanë lënë minoriteteve.
Pavarësisht se po vazhdojnë bisedimet për Qeverinë e re, zyrtarë të dy partive kanë deklaruar se pajtohen për takime të reja.
“Nuk na mungon disponimi që të takohemi me Lëvizjen Vetëvendosje dhe ta harmonizojmë tutje programin tonë”– ka thënë Veliu.
Kryetari i Podujevës shpreson se deri të enjten do të arrijnë marrëveshje me Vetëvendosjen dhe të definohen edhe votat e pakicave pro koalicionit qeveritar.
“Nuk është vetëm çështja e presidentit ajo me të cilën po diskutojmë me Vetëvendosjen. Koalicioni momental i bisedave LDK-VV i ka veç 57 vota. Ne nuk kemi informacione se çfarë ka bërë z.Kurti me votat e pakicave serbe”– ka thënë Veliu.
Vetëvendosje për herë të parë pritet të jetë në Qeveri derisa ka dhënë premtime se do të përmirësojë arsimin, shëndetësinë, diplomacinë e ekonominë.
Të enjten është caktuar data e konsitutimit të Kuvendit të Kosovës. Deri më tani kanë kaluar 25 ditë prej se janë certifikuar zgjedhjet ndërsa më shumë se dy muaj e gjysmë prej janë mbajtur zgjedhjet.
VAZHDO TË LEXOSH MË TEPËR PËR TEMËN
VV-LDK, a do të ketë koalicion qeverisës?
Nënshkrimi i marrëveshjes për qeverisje VV-LDK
Koalicioni/ Çfarë ndodhi në takimin VV-LDK?
