Nga 500 mijë euro, tashmë në 2 milionë euro. Kaq është oferta e fundit për mesfushorin e Kombëtares shqiptare, Keidi Bare, e bërë nga Getafe e La Liga-s.
Prestigjiozja “AS” që bën me dije se Getafe nuk e ka braktisur pistën e Bares. Madje, prestigjiozja spanjolle shkon më tej, duke thënë se për drejtuesit e saj, është lehtësisht i arritshëm një akord.
Getafe po planifikon një sulm deri në momentet e fundit të merkatos për Keidi Baren. Skuadra e La Ligas është e gatshme që të ofrojë deri në 2 milionë euro për kartonin e tij.
Jo vetëm kaq, por edhe mundësinë që shqiptari të qëndrojë i huazuar te Malaga, e cila e konsideron Baren jo vetëm një “thesar” të çmuar për vështirësinë ekonomike që po kalon, por edhe për rolin në fushë.
Deri në fund, pritet një lëvizje e fundit e Getafes për të. Merkatoja mbaron nesër dhe këto 24 orët e fundit janë vendimtare për të ardhmen e mesfushorit kuqezi.