Së shpejti Fieri do të ketë një treg të ri me standarde për tregtimin e gjësë së gjallë, i cili do t’i shërbejë të gjithë fermerëve të rajonit të jugut.
Punimet në tregun e kafshëve të gjalla në Fier po përparojnë, duke shkuar drejt finalizimit.
Kryetari i bashkisë Fier, Armando Subashi u shpreh sot se “shumë pak duhet për ta bërë këtë treg funksional dhe një nga më të frekuentuarit në vend, i cili do të rregullojë përfundimisht shitjen e kafshëve të gjalla jo vetëm në Fier, por në të gjithë qarkun”.
“Falë bashkëpunimit të ngushtë me projektin TAP, sot kemi një treg me kushte e standarde bashkëkohore, me kapacitet rreth 3 mijë krerë dhe me një thertore për raste emergjente”, tha Subashi.
Përveç kësaj, ai theksoi se “është një vend ideal për organizimin e panaireve të ndryshme”.
Projekt-studimi i fizibilitetit është përgatitur nga USAID (CoPlan), kurse ndërtimi i tregut është një bashkëfinancim i TAP dhe bashkisë Fier në vlerën prej rreth 320 mijë euro.
