Presidenti i SHBA Donald Trump sinjalizoi një përkeqësim të mëtejshëm të marrëdhënieve të tij me Kinën për shpërthimin e koronavirusit, duke thënë se ai nuk ka interes të flasë tani me Presidentin Xi Jinping dhe shkoi aq larg sa sugjeroi se ai madje mund të ndërpresë lidhjet me ekonominë e dytë më të madhe në botë.
Në një intervistë për Rrjetin e Biznesit Fox të transmetuar të enjten, Trump tha se ishte shumë i zhgënjyer nga dështimi i Kinës për të “frenuar” sëmundjen.
“Unë thjesht, tani nuk dua të flas me të,” tha Trump në intervistë.
Trump u pyet për sugjerimin e një senatori republikan që vizat e SHA-së të mos u pranohen studentëve kinezë që aplikojnë të studiojnë në fusha të lidhura me sigurinë kombëtare, siç janë llogaritjet kuantike dhe inteligjenca artificiale.
“Ka shumë gjëra që mund të bënim. Ne mund të shkpusim totalisht marrëdhëniet”, u përgjigj ai.
“Tani, nëse e bënim, çfarë do të ndodhte? Do të kursenim 500 miliardë dollarë, “tha Trump, duke iu referuar importeve të SHBA-së nga Kina, të cilave ai shpesh i referohet si para të humbura.
Zëdhënësi i ministrisë së jashtme kineze, Zhao Lijian u tha gazetarëve në Pekin të Premten se mbajtja e një marrëdhënie të qëndrueshme bilaterale i shërben interesave të të dy popujve dhe do të ishte e dobishme për paqen dhe stabilitetin botëror.
“Kina dhe SHBA tani duhet të bashkëpunojnë më shumë për të luftuar virusin së bashku, për të kuruar pacientët dhe për të rifilluar prodhimin ekonomik, por kjo kërkon që SHBA të dëshirojë të punojnë me ne për këtë,” tha Zhao.
Sekretari amerikan i Thesarit Steven Mnuchin i tha Fox Business Network se është e nevojshme të sigurohet shumë më tepër informacion në lidhje me koronavirusin dhe Trump po shqyrtonte opsionet.
“Presidenti është i shqetësuar. Ai po shqyrton të gjitha opsionet e tij. Natyrisht, ne jemi shumë të shqetësuar për ndikimin e këtij virusi në ekonomi, në punët amerikane, shëndetin e publikut amerikan dhe presidenti do të bëjë gjithçka për të mbrojtur ekonominë dhe për të mbrojtur punëtorët amerikanë, “tha Mnuchin.
Trump dhe mbështetësit e tij republikanë kanë akuzuar Pekinin se nuk ka njoftuar botën për ashpërsinë dhe shtrirjen e shpërthimit të koronavirusit.
Kina këmbëngul se ajo ka qenë transparente, dhe, të dyja palët kanë vënë në dyshim të ardhmen e marrëveshjes tregtare.
Scott Kennedy i Qendrës së Uashingtonit për Studime Strategjike dhe Ndërkombëtare të Studimeve, i quajti komentet e Trumpit “trimëri të rrezikshme”.
“Shmangia e komunikimit nuk është një strategji efektive për zgjidhjen e një krize që kërkon bashkëpunim global. Dhe ndërprerja e marrëdhënieve ekonomike do të dëmtonte keq ekonominë amerikane, “tha ai.
Agjencitë e inteligjencës amerikane kanë thënë që koronavirusi nuk duket i krijuar nga njeriu ose i modifikuar gjenetikisht, por, megjithatë, Trump tha në intervistën e tij se Kina duhet ta kishte ndaluar atë.
Përkthyer dhe përshtatur nga The Globe and Mail/ Konica.al
VAZHDO TË LEXOSH MË TEPËR PËR TEMËN
Në luftë me koronavirusin dhe të vërtetën!
