Një ngjarje e rëndë është regjistruar pasditen e sotme në Fier, ku një 30-vjeçar është mbytur në lumin Vjosë.
Ngjarja ka ndodhur rreth orës 13:40, në fshatin Selishtë, ndërsa viktima është identifikuar si Armando Begaj.
Ai së bashku me dy shokët e tij, kishin shkuar në lum për t’u larë. Ndërsa po rrezikonte të mbytej, i riu kishte kërkuar ndihmën e dy shokëve, por ata fillimisht kanë menduar se ai po bënte shaka. Ata u përpoqën t’i shkonin në ndihmë pasi panë që trupi po fundosej dhe e mori rrjedha e lumit, por nuk kanë mundur ta shpëtojnë.
Kanë qenë shokët e Begaj që kanë njoftuar policinë, e cila ka mbëritur në vendngjarje. Policia dhe polumbarët po punojnë për gjetjen e trupit të tij.
Nderkohe, një tjetër ngjarje tragjike raportohet se ka ndodhur në Dibër, pas mbytjes së 30-vjeçarit në Lumin Vjosë, në Fier.
Eshtë mbytur në lumin Drini i Zi një fëmijë. Ka qenë një telefonatë në Spitalin e Dibrës, që ka dhënë lajmin e trishtë, pasi ka kërkuar një ambulancë, që të shkojë për të marrë të mbyturin në afëri të Luznisë, në lumin Drini i Zi.
Ambulanca dhe grupi hetimor janë nisur drejt vendngjarjes, ndërsa nuk dihet mosha dhe identiteti i fëmijes.
Siç raporton gazetari Doçi, fëmija dyshohet se është mbytur shumë orë më parë dhe që e ka marrë rrjedha e lumit rreth 30 kilometra. Kanë qenë banorët e zonës, në fshatin Selane, që e kanë gjetur dhe kanë njoftuar policinë.
