Nëse maska nuk mbahet siç duhet, gjasat janë që rreziku i infeksionit me koronavirus të jetë aty. Ekspertët e Institutit të Shëndetit Publik thonë se nga vëzhgimet e kryera shumë qytetarë nuk e mbajnë korrekt maskën.
“Shumica dërmuese nuk e mbajnë si duhet, e mbajnë poshtë hundës, kur futen në një mjedis e ulin poshtë mjekrës, kjo nuk duhet kurrsesi. Dhe pse mbajnë maskë, ajo duhet shoqëruar me higjienë dhe distance për të qenë efektive”, thotë Jonida Haxhiu, specialiste në ISHP.
Por kur një maskë konsiderohet se është mbajtur korrekt dhe na siguron mbrojtje maksimale?
“Kur mbulon hundën dhe mjekrën totalisht, para se të vihet duart të dezinfektohen, pasi hiqet duar dezinfektohen serish. Maska preket vetëm anash nëse na duhet ta ulim apo ta heqim, maskat njëpërdorimshme hidhen menjëherë në kosh”, shton ajo.
Po aq e rëndësishme është edhe kohëzgjatja e përdorimit të një maske. Specialistet e Shëndetit Publik thonë se maskat më të përdorshme aktualisht janë ato prej tekstili, të cilat nuk duhet të përdoren me shume se 4 orë, dhe në rastet kur maska laget nga spërklat duhet hequr dhe vendosur një tjetër.
Përdorimi i maskës në çdo mjedis veç shtëpisë është i detyrueshme dhe mos respektimi i këtij rregulli çon në gjobitjen e personit mbi 11-vjeç.
VAZHDO TË LEXOSH MË TEPËR PËR TEMËN
“Maskë dhe distancën fizike, virusi është kudo!”
“Covid qëndron më gjatë në ajër”
