Rexhep Taip Erdogan i bën thirrje BE-së për të mbështetur “kthimin e një faqeje të re” në lidhjen e saj me Turqinë. Turqia është e gatshme të vendosë një “axhendë pozitive” me BE-në, duke përdorur një perspektivë afatgjatë për të ndihmuar në rikthimin e marrëdhënieve me bllokun, tha të martën presidenti turk.
Në takim me ambasadorët e vendeve anëtare të BE, Rexhep Taip Erdogan tha se ai pret që të dërguarit të mbështesin “kthimin e një faqeje të re” në marrëdhëniet Turqi-BE. “Është në duart tona të transformojmë me sukses marrëdhëniet BE-Turqi në 2021,” tha ai në një tubim në Pallatin zyrtar, Cankaya në kryeqytetin Ankara.
“Ashtu si procesi i anëtarësimit gati 60-vjeçar i vendit tonë është një zgjedhje strategjike për ne, pranimi nga BE i vendit tonë për anëtarësim të plotë do të jetë gjithashtu një zgjedhje ontologjike për të ardhmen e unionit.” Megjithëse Turqia kërkoi për herë të parë anëtarësimin në BE dekada më parë, vetëm në 2005 u bë zyrtarisht një kandidate për anëtarësim të plotë dhe në vitet e fundit procesi i pranimit ka ngecur.
Erdogan theksoi se 2020 nuk ishte një vit i lehtë për marrëdhëniet Turqi-BE, duke shtuar se disa vende anëtare të BE synuan të zgjidhnin problemet bilaterale me Turqinë “në sallat e BE”. “Axhenda Turqi-BE është abuzuar duke u fshehur pas pretekstit të unitetit dhe solidaritetit,” tha ai.
Zyrtarët turq kanë kritikuar përpjekjet greke për t’i kthyer çështjet bilaterale në çështje Turqi-BE, duke theksuar gatishmërinë e Ankarasë për t’u ulur në tryezën e bisedimeve me Athinën për të zgjidhur mosmarrëveshjet e tyre përmes dialogut.
Erdogan përsëriti gjithashtu nevojën për BE-në për të trajtuar kërcënimin e paragjykimeve anti-muslimane në vendet e tyre, duke thënë: “Përveç kërcënimit të sigurisë së gati 6 milion njerëzve që jetojnë në Evropë, Islamofobia po kthehet në një vrimë të zezë të madhe për sa i përket vlerave evropiane”.
Takimi me presidentin pasoi një takim të ngjashëm të martën midis Mevlut Çavusoglu, ministrit të jashtëm turk, me ambasadorët e BE.
Pas një viti uljesh dhe ngritjesh, udhëheqësit turq kanë thënë se shpresojnë për përparim në lidhjet me BE-në këtë vit dhe presin që blloku të ndërmarrë hapa të qartë drejt këtij qëllimi.
Mesdheu Lindor
Erdogan gjithashtu bëri thirrje për transformimin e Mesdheut Lindor nga një “zonë konkurrence” në një “zonë bashkëpunimi” për t’i shërbyer interesave afatgjata të rajonit.
Ai tha se Turqia ka dhënë kontribute të rëndësishme në sigurinë e furnizimit me energji të Evropës me projektet e saj të energjisë.
“Ne nuk po kërkojmë asgjë për të cilën nuk kemi të drejtë në Mesdheun Lindor. Ne po përpiqemi të mbrojmë interesat legjitime të vendit dhe kombit tonë në lidhje me burimet e hidrokarbureve në rajon,” tha ai.
Treguesi më konkret i qëndrimit të “verbërisë strategjike” të BE-së është çështja e Mesdheut Lindor dhe Qipros, tha ai, duke shtuar se Turqia u përball me “padrejtësi serioze” për të dy çështjet.
Ai gjithashtu vuri në dyshim rolin e BE në ndihmën për zgjidhjen e çështjes së Qipros, duke treguar mungesën e fundit të bllokut të kontaktit me palën Qipriote Turke. Në vend që të ngecim në “modelet e dështuara” për çështjen e Qipros, ne kemi nevojë për të diskutuar alternativa të reja dhe reale, tha ai.
Turqia së fundmi ka theksuar se përpjekjet për një zgjidhje “federale” për ishullin e ndarë të Qipros kanë dalë të pashpresa dhe çdo bisedim në të ardhmen duhet të përqendrohet në dy shtete të veçanta, sovrane në ishull.
Siç u njoftua të hënën, pas një ndërprerje pesë-vjeçare, Greqia dhe Turqia së shpejti pritet të rinisin bisedimet kërkimore në Stamboll mes tensioneve në Mesdheun Lindor
Çështja e të drejtave të energjisë dhe kufijve detarë janë vendosur të mbizotërojnë bisedimet. Turqia, e cila ka vijën bregdetare më të gjatë kontinentale në Mesdheun Lindor, ka hedhur poshtë pretendimet kufitare detare të Greqisë dhe administratës Greke Qipriote në rajon, duke theksuar se këto pretendime të tepërta shkelin të drejtat sovrane të Turqisë dhe Turqve Qipriotë.
Ankaraja vitin e kaluar dërgoi disa anije stërvitje për të kërkuar energji në Mesdheun Lindor, duke pohuar të drejtat e veta në rajon, si dhe ato të Republikës Turke të Qipros Veriore.
Udhëheqësit turq kanë theksuar vazhdimisht se Ankaraja është në favor të zgjidhjes së të gjitha problemeve të pazgjidhura në rajon përmes ligjit ndërkombëtar, marrëdhënieve të fqinjësisë së mirë, dialogut dhe negociatave.
Luftimi i Covid-19
Erdogan theksoi se pandemia e koronavirusit tashmë ka lënë “dhimbje të thellë” në pothuajse çdo vend të botës, shenja të cilat nuk do të fshihen për vite me rradhë.
“Procesi që po kalojmë na ka kujtuar edhe një herë se i gjithë njerëzimi është në të njëjtën varkë, pavarësisht nga feja, gjuha, raca apo rajoni. Të gjithë kemi parë që mund të jemi të suksesshëm në luftimin e pandemisë falë solidaritetit dhe bashkëpunimit global,” tha ai.
Gjatë pandemisë, tha Erdogan, Turqia ofroi mbështetje mjekësore për 156 vende dhe 11 organizata ndërkombëtare, pa asnjë diskriminim, përfshirë “miqtë e saj evropianë”.
Ai nënvizoi se së bashku me kthimin e mbi 100,000 qytetarëve të saj përsëri në vend nga fluturimet e evakuimit emergjent për shkak të pandemisë, Turqia gjithashtu evakuoi më shumë se 5.500 të huaj nga 67 vende.
Turqia gjithashtu ndihmoi 38.000 shtetas të huaj në Turqi të cilët dëshironin të ktheheshin në vendet e tyre, shtoi ai.
“Ne i bëmë të gjitha këto jo sepse prisnim një përgjigje financiare, por sepse ndiheshim të përgjegjshëm për familje në nevojë.”
Duke vënë në dukje se pandemia COVID-19 ka marrë hov në të gjithë botën javët e fundit, Erdogan tha se sukseset në përpjekjet e vaksinimit kanë rritur shpresat.
Përkthyer dhe përshtatur nga Dailysabah/ F.H, Konica.al
VAZHDO TË LEXOSH MË TEPËR PËR TEMËN
Erdogan bën bashkë Merkelin, Macronin e Putinin!
