Me temperaturat që pritet të zbresin deri në -13 gradë celcius në Pukë, kjo e dielë parashikohet të jetë një prej ditëve më të ftohta të vitit.
Në Dibër, termometri ka shënuar -12 gradë, ndërsa ngricat po krijojnë probleme kryesisht në zonat malore.
Banorët e njësive Kala e Dodës dhe Zall Dardhë denoncojnë se rrugët janë të bllokuara për shkak të trashësisë së dëborës që shkon deri në 20 cm dhe akullit të krijuar nga temperaturat e ulta!
Probleme ka edhe më furnizimin me energji elektrike dhe ujë të pijshëm për shkak të ngrirjes së tubacioneve.
Edhe qarku i Kukësit vijon të jetë i mbërthyer nga moti i ftohtë dhe acari duke sjellë ngrica e akull në rruge.
Rekomandohet kalimi me zinxhirë në akset nacionale të Kukësit, Tropojës e Hasit.
Shumë fshatra vuajnë mungesën e energjisë elektrike për shkak të dëmtimit të shtyllave.
-11 gradë celcius ka shënuar termometri ndërkohë në Korçë duke e bërë një ditë të acartë edhe në juglindje.
Për shkak të ngricës në rrugën Boboshticë-Dardhë rekomandohet lëvizja me zinxhirë nga km 9 deri në km 13, ndërsa e bllokuar mbetet aksi Shtyllë-Panarit. Në rrugët kombëtare nuk raportohen problematika, por drejtuesit e mjeteve këshillohen që të tregohen të kujdesshëm.
VAZHDO TË LEXOSH MË TEPËR PËR TEMËN
