Një ngjarje e rëndë ka ndodhur në Maternitetin e Fierit, ku humbi jetën gjatë lindjes një grua 30-vjecare.
Edhe pse ende nuk ka një njoftim zyrtar nga Policia, të afërmit e gruas së re janë ata që kanë bërë publik lajmin duke hedhur akuza ndaj bluzave të bardha. Sipas tyre, e reja ka shkuar për të lindur dhe i është nënshtruar një operacioni cezarian. Operacioni shkoi mirë deri në një moment, por sapo është shpëtuar bebja, gruas i janë shfaqur komplikacione.
Mjekët mësohet t’u kenë thënë familjarëve se gruaja pësoi trombozë e vetëm pak minuta më vonë u kanë dhënë një tjetër njoftim, që vdekja e gruas erdhi për shkak të një ataku kardiak. Kjo kontradiktë për shkaqet e vdekjes së gruas ka bërë që familjarët të ngrenë dyshime për mjekim të gabuar të saj. Viktima është Elisabeta Lamaj, nga fshati Vlosht dhe e martuar në Drenovë të Re, në Ballsh. E ndjera ka edhe një vajzë 5 vjeçe dhe priste fëmijën e dytë, që fatmirësisht arriti të shpëtonte. Bashkëshorti i saj, Leonard Lamaj është punonjës policie në Burgun e Fierit. Ngjarja ndodhi të shtunën, ndërsa familjarët iu drejtuan dje Prokurorisë, nga e cila kërkojnë të nisin hetimet.
VIKTIMA
Nëna e re, e cila ka edhe një fëmijë tjetër 5 vjeç nuk ka shfaqur asnjë shqetësim tjetër më parë. Ajo e kishte planifikuar lindjen, pasi edhe fëmijën e parë e kishte lindur me operacion. Elisabeta Lamaj ishte nga fshati Vlosh i Fierit dhe ishte martuar në Drenovë të Mallakastrës.
Familjarët kanë deklaruar në Prokurori se duan që 30-vjeçares t’i bëhet ekspertiza mjekoligjore, për të mësuar shkakun real që solli vdekjen e saj. Pas marrjes së denoncimit, Prokuroria e Fierit ka nisur punën për të hetuar shkaqet e vërteta të vdekjes së sallën e lindjes të gruas së re. Po ashtu, pritet që një grup mjekësh nga Tirana të këqyrin trupin e pajetë të viktimës. Ekspertiza mjekoligjore do të përcaktojë edhe shkaqet e vdekjes së 30- vjeçares, Elisabeta Lamaj.
Pas kallëzimit që kanë bërë për neglizhencën e mjekëve, familjarët shprehen se bluzat e bardha në Maternitetin e Fierit, fillimisht u kanë thënë se Elisabeta ka pësuar trombozë, ndërsa më pas u kanë thënë se ka pësuar atak kardiak. “Mjekët na kanë dhënë dy versione. Mjekët thanë në fillim se pësoi trombozë dhe më pas thanë se pësoi atak”, janë shprehur prindërit e viktimës dhe bashkëshorti i saj, i cili punon si gardian në burgun e Fierit.
VAZHDO TË LEXOSH MË TEPËR PËR TEMËN
