Merr udhë Liga Unike. Kampionati i përbashkët i basketbollit mes Shqipërisë dhe Kosovës do të nisë me 6 prill. Në zyrat e Ligës Unike është hedhur shorti për ndeshjet çerekfinale të kësaj gare, ku do të kemi ndeshje shumë interesante.
Skuadrat e nominura nga Federata Shqiptare e Basketbollit janë Teuta, Goga Basket, Vllaznia dhe Tirana, kurse nga Federata e Basketbollit e Kosovës janë Sigal Prishtina, Golden Eagle Ylli, Peja dhe Rahoveci.
Sipas shortit të hedhur, në çerekfinale do të ballafaqohen Vllaznia nga Shkodra me Pejën, kurse do të kemi edhe derbin kosovar në këtë ligë, ndërmjet Sigal Prishtinës dhe Golden Eagle Yllit, skuadra që ishin ballafaquar edhe në finale të Kupës së Kosovës, ku triumfuan prishtinasit.
Në çerekfinale do të kemi edhe derbin shqiptar ndërmjet Goga Basket dhe Tiranës, kurse çifti i fundit çerekfinal është mes Rahovecit dhe Teutës nga Durrësi. Në gjysmëfinale do të përballen fituesi i Grupit A me atë D dhe fituesi i Grupit B me atë C.
Gara do të zhvillohet në format të “Final 8” me sistem eliminimi dhe ndeshjet e para çerekfinale do të luhen në Rahovec me datë 6 dhe 7 Prill 2021, ndërsa ndeshjet gjysmëfinale, gara për vendin e tretë dhe finalja e madhe e Ligës Unike do të zhvillohen me datat 13-14 Prill në Durrës.
E martë
16:00 Vllaznia-Peja
19:00 Rahoveci-Teuta
E mërkurë
16:00 Goga Basket-Tirana
19:00 Sigal Prishtina-Golden Eagle Ylli
Gjysmëfinalet dhe finalet
13 Prill
16:00 Gjysmëfinalja e parë (Fituesi A dhe D)
19:00 Gjysmëfinalja e dytë (Fituesi B dhe C)
14 Prill
16:00 Ndeshja për vendin e tretë
19:00 Finalja e madhe
VAZHDO TË LEXOSH MË TEPËR PËR TEMËN
Liga Unike e Basketbollit, dallëndyshja e parë
