“Pyet mjekun” është rubrika më e re, një platformë që bën të mundur kontaktin ndërmjet mjekut dhe pacientit.
Nëse keni ndonjë pyetje, për gjithçka që ju shqetëson në shëndetin tuaj, këtu do të merrni përgjigje nga mjekë me eksperiencë, pa rezervime takimesh dhe duke shmangur radhët e gjata.
Pacienti: Nervi shiatik, sa zgjasin dhimbjet dhe si mund t’i qetësojmë?
Mjeku: Më shpesh, dhimbja e nervit shiatik është si rezultat i hernies diskale, pra i zhvendosjes ose dëmtimit të vertebrave pikërisht aty ku kalon dhe nervi shiatik, gjatë së cilës bëhet edhe shtypja e fijes nervore dhe rrjedhimisht duke çuar në perceptimin e dhimbjes. Shkaktarë të tjerë mund të jenë infeksione të ndryshme (inflamacione) të kockave që janë afër me këtë zonë, hemorragji të ndryshme në atë zonë, plagosjet, aksidentet, traumat etj.
Kjo situatë mund të krijohet edhe gjatë shtatzënisë si rezultat i shtypjes së nervit shiatik nga uterusi (mitra) i zmadhuar gjatë kësaj periudhe. Faktorë risku janë edhe artritet degjenerative të vertebrave të belit, të kockave të bacinit (legenit), si edhe sëmundjet e disqeve vertebrale.
Shiatiku përshkruan dhimbjen e vazhdueshme të ndjerë përgjatë nervit shiatik. Ky nerv fillon nga fundshpina, vazhdon poshtë nëpër vithe dhe deri në fund të këmbës. Ai është nervi më i gjatë në trupin e njeriut. Dhimbja ndodh atëherë kur ky nerv shtypet ose plagoset. Dëmtimi më së shpeshti rezulton nga inflamacioni (pezmatimi), nga zgjerimi kockor për shkak të artritit ose të një zhvendosje diskale (hernie) në fundshpinë.
Cilat janë simptomat?
Shiatiku shkakton dhimbje që fillon në fund të shpinës dhe përhapet në vithe, në pulpë dhe deri në shputën e këmbës. Dhimbja në përgjithësi ndihet si mpirje, therje apo djegie. Ndonjëherë ajo fillon gradualisht dhe përkeqësohet gjatë natës dhe zakonisht rëndohet nga lëvizja. Shiatiku gjithashtu mund të shkaktojë dhimbje në formë shpimi gjilpërash, mpirje ose dobësi të muskujve në këmbën e prekur.
Si vendoset diagnoza?
Mjeku do të vlerësojë simptomat dhe historinë mjekësore. Mjeku do të dojë të dijë nëse keni dhimbje në fundshpinë dhe që përhapet në këmbë dhe nëse keni dobësi të muskujve në këmbë ose në shputën e këmbës. Mjeku mund të bëjë pyetje që mund të sugjerojnë një gjendje të rëndë, e tillë si një frakturë të kockave apo infeksion.
Mjeku do të dojë të dijë nëse keni pasur:
Ndonjë traumë (dëmtim)
Temperaturë të lartë apo ethe
Problem që kanë të bëjnë me zorrët apo gjëndrat
Ndonë histori kanceri
Humbje në peshë kohët e fundit
Diagnoza mbështetet kryesisht në simptomat tuaja. Diagnoza mund të vendoset edhe kur të gjitha analizat janë normale.
Sa zgjat si sëmundje, sa kohë zgjasin dhimbjet?
Shiatiku zakonisht shërohet vetvetiu pas një periudhe pushimi (relaksi) dhe aktivitetesh të kufizuara. Shumica e njerëzve me dhimbje të nervit shiatik ndihen më mirë brenda 6 javësh. Dhimbja që zgjat më shumë se 6 deri në 12 javë duhet të vizitohet nga mjeku. Nëse simptomat janë të rënda ose të zgjatura, ju mund t’i referoheni një mjeku që është i specializuar në trajtimin e dhimbjeve të mesit.
Parandalimi!
Pasi dhimbja e shiatikut të kalojë, ekzistojnë ushtrime, shtriqje, zgjatje dhe masa të tjera që mund të parandalojnë kthimin e saj. Doktori mund t’ju rekomandojë tek një fizioterapist për të zhvilluar një program të personalizuar.
Disa hapa që mund t’i merrni ndërkohë:
Praktikoni qëndrimin drejt (posturë e rregullt).
Bëni ushtrime për muskujt e barkut.
Ecni ose notoni.
Ngrini pesha në mënyrë të kujdesshme dhe të sigurtë.
Shmangni qëndrimin ulur ose në këmbë per periudha të gjata kohore.
Flini gjumë në mënyrë korrekte.
Shtriquni (bëni tërheqje).
Shmangni takat e larta.
Nëse keni edhe ju pyetje, dhe doni të merrni një përgjigje të shpejtë nga mjekët e “spitalit tonë online”, klikoni këtu. Identiteti juaj do të mbetet anonim.
VAZHDO TË LEXOSH MË TEPËR PËR TEMËN
Mos ngatërroni dhimbjet e lehta të mesit me ato të legenit!
Si të lehtësoni dhimbjen e shpinës?
Pastron ulçerën dhe kuron hemorroidet
