Maxhoranca socialiste voton sot raportin final të Komisionit Hetimor për shkarkimin e Presidentit Ilir Meta. Kuvendi e ka futur si pikë të parë në rendin e ditës çështjen e shkarkimit të kreut të shtetit.
Beteja e socialistëve për të shkarkuar Ilir Metën kaloi provën e parë, atë të Komisionit Hetimor, teksa sot pritet që në seancë plenare në Kuvendin e Shqipërisë të ngrihen për herë të parë kartonët për të shkarkuar një President. Por, për të shkarkuar kreun e shtetit duhet që të jenë në të njëjtin mendim së paku 94 deputetë. Aktualisht, socialistët në Kuvend kanë 74 mandate, 3 vota të tjera janë të garantuara.
Bëhet fjalë për 3 deputetët që hynë në Kuvend në 2017 me logon e PDIU-së si dhe vota e deputetes socialdemokrate Jetmira Rraboshta, e cila zëvendësoi kryetarin e PSD-së Tom Doshi, pasi ky i fundit dha dorëheqjen e parevokueshme orët e para të datës 26 prill, një ditë pas zgjedhjeve parlamentare. Duke qenë se të vetëm socialistët nuk arrijnë dot që të shkarkojnë politikisht kreun e shtetit do të duhet që të thithin vota edhe nga deputetët e opozitës së re në Parlament që duket se nuk është e vështirë. Kjo për një arsye të thjeshtë, se në zgjedhjet e 25 prillit janë të paktën 10 deputetë që kanë hyrë në Parlament nga listat e opozitës që dogjën mandatet, që u futën në listën e PS-së në zgjedhjet e 25 prillit.
DEPUTETËT QË U ANGAZHUAN ME PS
Ndër kartonët që pritet të ngrihen sot në seancën për shkarkimin e Metës, social- istët janë të bindur për mbështetjen e deputetëve; Lefter Koka, Aurora Mara, Ylli Shehu, Enver Roshi, Nimet Musai, Ediola Braha, Halit Valteri, Klajdi Qama, Vasil Sterjovski dhe Edmond Rrushi. Por, socialistët kanë pritshmëritë t’i sigurojnë 94 votat, nisur kjo dhe nga fakti që për të ngritur Komision Hetimor për shkarkimin e Ilir Metës, ishin dakord 97 deputetë. Një tjetër fakt që bie në sy është se nga 10 deputetët që në 25 prill morën vota për PS-në, si pjesë e listës së maxhorancës në Parlament hynë nga lista e LSI.
Kujtojmë që vetëm Halit Valteri hyri në Parlament nga lista e Partisë Demokratike. Ndërkohë, Lefter Koka që në zgjedhjet e fundit garoi në listën e PS-së në Durrës, në zgjedhjet e 2017 mori vota për LSI-në dhe më herët ka qenë ministër i Mjedisit me logon e Lëvizjes Socialiste për Integrim. Deputetja tjetër, Aurora Mara, që ishte e dyta në listën e PS-së në Dibër, në Parlament hyri si deputete, pasi nuk iu bind vendimit të LSI-së për djegien e mandat- eve në 2019. Po ashtu, edhe deputetët e tjerë në 2017 kanë mbledhur vota për LSI-në kur në fushatë ishte edhe Ilir Meta vetëm pak kohë, pasi ishte zgjedhur President, por që nuk kishte marrë mandatin.
AKUZAT
Në përfundim të hetimit që zgjati afërsisht një muaj, Komisioni i Posaçëm Parlamentar që u drejtua nga Alket Hyseni që nuk do të jetë më në Parlamentin e ardhs- hëm doli në përfundimin se kreu i shtetit “Ka cenuar rëndë parimin e ushtrimit të sovranitetit nga ana e popullit (në kundërshtim me ne- nin 2, pika 1 të Kushtetutës); Ka shkelur Kushtetutën e ka marrë njëkohësisht tagra të sovranit dhe Kuvendit; Ësh- të sjellë arbitrarisht me push- tetin, përkundër natyrës së Republikës Parlamentare (në kundërshtim me nenin 1, pika 1, të Kushtetutës); Ka anuluar arbitrarisht datën e zgjedhjeve (në kundërshtim me nenin 92, germa “gj”, të Kushtetutës dhe nenin 8, 9 dhe 10 të Kodit Zgjedhor); Ka cenuar parimin e periodicitetit të zgjedhjeve (në kundërshtim me nenin 1, pika 3 dhe nenin 109 të Kushtetutës);
Ka cenuar parimin e ushtrimit të pushtetit në shtet nga një qeverisje e dalë nga zgjedhje të lira (në kundërshtim me nenin 1, pika 3, të Kushtetutës); Ka cenuar parimin e kushtetutshmërisë dhe ligjshmërisë (në kundërshtim me nenin 4 paragrafi i dytë i Kushtetutës dhe nenin 4 të Kodit të Pro- cedurave Administrative); Ka nxjerrë një akt në kundër- shtim të hapur dhe flagrant me ligjet; Ka cenuar parimin e të drejtës së qytetarëve si sovranë për të zgjedhur dhe për tu zgjedhur (në kundërshtim me nenin 45, pika 1, të Kushtetutës)”, thuhet në raportin e Komisionit Hetimor. Ndërkohë, vendimin përfundimtar për shkarkimin e Presidentit nëse sot Parlamenti voton pro largimit të tij, e jep Gjykata Kushtetuese, e cila aktual- isht është funksionale me 7 anëtarë nga 9 që ka normalisht.
DEPUTETËT E OPOZITËS QË U PËRFSHINË NË LISTAT E PS
Lefter Koka (Ish-Deputet i LSI-së në Durrës)
Aurora Mara (Hyri ne Parlament nga lista e LSI-së në Dibër)
Ylli Shehu (Hyri në Parlament nga lista e LSI-së)
Enver Roshi (Hyri ne Parlament nga lista e LSI-së në Gramsh)
Nimet Musaj (Hyri ne Parlament nga lista e LSI-së)
Ediola Braha (Hyri ne parlament nga lista e LSI-së)
Halit Valteri (Hyri ne Parlament nga lista e PD-së)
Klajdi Qama (Hyri ne Parlament nga lista e LSI-së)
Vasil Sterjovski (Hyri ne Parlament sipas djegies së mandateve, si pjesë e koalicionit të LSI-së)
Edmond Rrushi (Hyri ne Parlament si pjesë e listës së
LSI-së)
VAZHDO TË LEXOSH MË TEPËR PËR TEMËN
‘Zbutet’ Meta, firmos dekretin: Rama, ministri i ri i Jashtëm
“Diplomacia në Shqipëri në ngërç”
