Gazeta franceze, “L’Intransigeant”, ka botuar, të mërkurën e 31 marsit 1937, në faqen nr.3, një shkrim në lidhje me vendimin historik të mbretit Zog, për heqjen e “çarçafit – ferexhesë” nga gratë shqiptare, që sjell për publikun shqiptar, Aurenc Bebja:
Si u prit ky vendim në Tiranë dhe në mbarë Shqipërinë?
“Një vendim i mbretit Zog, i cili është mirëpritur (Nga i dërguari ynë special) Tiranë, 30 mars.
“Shqiptaret e bukura, që prej katër ditësh, kanë zbuluar fytyrat e tyre.
Mysliman besnik, por sundimtar modern, Mbreti Ahmet Zogu, në fakt, ka adoptuar nga Parlamenti një ligj që urdhëron gratë e mbretërisë së tij të heqin dorë nga “çarçafi – ferexheja”, një zakon i vjetër i imponuar në shekullin e XV-të nga turqit, kur ata pushtuan Shqipërinë pas vdekjes së heroit kombëtar shqiptar Skënderbeut.
Ky vendim ka ngjallur gëzim të madh në të gjithë Shqipërinë : tek gratë, së pari, të cilat janë, si të gjitha bijat e Evës, të lumtura që admirohen, dhe tek të gjithë të rinjtë.
Tirana është bërë papritur një qytet i lumtur… Të qeshurat dhe rinia ndriçojnë të gjitha fytyrat… Dhe të huajt, të kënaqur, zbulojnë bukuritë që nuk dyshonin…
Kudo, e miratojnë vendimin e sovranit – i cili qe bërë popullor, me 1 mars 1928, duke adoptuar nga Parlamenti, barazinë e të drejtave mes gruas dhe burrit.
Padyshim, që disa myslimanë të vjetër, të cilët kundërshtojnë modernizmin, protestojnë në rrugët e Tiranës, kur takohen me gra pa ferexhe, por ata janë vetëm një pakicë e vogël që nuk shqetëson asnjeri.
Dhe bukuroshet shqiptare u përgjigjen atyre, nëpërmjet buzëqeshjeve më të lumtura”. R. Singer.
VAZHDO TË LEXOSH MË TEPËR PËR TEMËN
“Me fat, kush blen makinën e një mbretëruci shqiptar…”
“Ahmet Zogu, serbët dhe vrasja e Hasan Prishtinës”
“Edhe më i varfri i shqiptarëve… ka një hije mbretërore”
