Bashkimi Evropian është gati t’i japë goditjen e tij më të madhe ekonomike presidentit rus Vladimir Putin: ndërprerjen e importeve të naftës ruse. Nuk do të ndodhë brenda natës.
Propozimi i zbuluar të mërkurën kërkon një ndërprerje të importeve të naftës ruse gjatë gjashtë muajve të ardhshëm dhe një ndalim të të gjitha produkteve të naftës ruse deri në fund të vitit.
Megjithatë, është një pikë kthese e madhe për Evropën që është vonuar shumë.
BE ka varësi të madhe në energjinë ruse pavarësisht paralajmërimeve nga Shtetet e Bashkuara dhe aleatët e tjerë. Përpara se Putini të pushtonte brutalisht Ukrainën, BE-ja mbështetej te Rusia për 30 për qind të naftës dhe 40 për qind të nevojave të saj për gaz, sipas bankës zvicerane UBS.
Tani BE-ja po tregon një unitet dhe gatishmëri për të sakrifikuar për Ukrainën dhe të mirën globale, ndryshe nga sa ishte imagjinuar vetëm disa muaj më parë.
Presidenti Biden ndaloi importet e naftës dhe gazit natyror rus më 8 mars, por kjo lëvizje ishte kryesisht simbolike sepse Shtetet e Bashkuara importonin pak nga Rusia.
Vendimi i BE do të ketë pasoja reale, duke përfshirë një goditje financiare për Putinin.
Teksa Rusia ka të ngjarë të gjejë vende të tjera për të blerë një pjesë të naftës që do të kishte shkuar në Evropë, ka të ngjarë të jetë një luftë për ta shitur të gjithën dhe pothuajse me siguri do të ketë më shumë zbritje.
Të gjithë vendet duhet të pajtohen me këtë lëvizje.
Hungaria dhe Sllovakia – dy nga vendet më të varura nga energjia ruse – janë pengesë në marrëveshje.
Ka të ngjarë që këto kombe të kenë një afat kohor shumë më të gjatë për një ndalim të plotë.
Më e rëndësishmja, për momentin, paratë ende do të shkojnë drejt Putinit. Por BE-ja. duhet të lëvizë me shpejtësi dhe vendosmëri këtë javë për të miratuar ndalimin e naftës dhe për t’i dërguar një mesazh Putinit se mizoritë që po kryen Rusia në Ukrainë nuk janë të pranueshme.
Siç tha të mërkurën Ursula von der Leyen, presidente e Komisionit Evropian, “Putini donte të fshinte Ukrainën nga harta. Është e qartë se ai nuk do të ketë sukses.”
Pasojat afatshkurtra do të jenë të ashpra.
Në Shtetet e Bashkuara, çmimet e naftës kanë arritur nivele rekord në ditët e fundit. Çmimet e naftës së papërpunuar janë kthyer mbi 100 dollarë për fuçi dhe janë rritur sërish pas propozimit.
BE po përpiqet të gjejë më shumë burime të naftës bruto dhe gazit natyror. Anëtarët e saj mund të marrin disa furnizime shtesë nga Norvegjia dhe Shtetet e Bashkuara, por një mbështetje më e madhe në furnizimet e Afrikës së Veriut dhe Lindjes së Mesme është e pashmangshme.
Për Biden, zgjedhja e tij më e mirë ka të ngjarë të detyrojë Venezuelën të rrisë prodhimin e naftës.
Rritja e çmimeve të energjisë është padyshim një vështirësi. Por është e rëndësishme të mbani mend se sa përparim është bërë.
Gjermania është një ilustrim i mirë; ajo ka reduktuar importet e saj të naftës ruse nga 35 përqind e nevojave të saj vitin e kaluar në 12 përqind tani, qymyrin nga 45 përqind në 8 përqind dhe gazin natyror nga 55 përqind në 35 përqind.
Më mirë vonë se kurrë për BE-në.
Burimi: The Washington Post
Përktheu dhe përshtati: Konica.al
VAZHDO TË LEXOSH MË TEPËR PËR TEMËN
A do të përçahet BE në vendimin për embargon e naftës?
Çfarë nënkupton ndalesa që SHBA-ja i bëri naftës ruse?
