Diplomati veteran amerikan Henry Kissinger tha të hënën se Uashingtoni dhe Pekini duhet të përpiqen të shmangin vendosjen e Tajvanit në qendër të marrëdhënieve të tyre të tensionuara diplomatike, duke shtuar se nevoja që dy ekonomitë më të mëdha të botës të shmangin konfrontimin e drejtpërdrejtë është në interes të paqes globale.
Komentet e tij vijnë menjëherë pasi presidenti Joe Biden tha se SHBA-ja do të ishte e gatshme të ndërhynte ushtarakisht nëse Kina pushton ishullin demokratik dhe të vetëqeverisur.
Deklaratat e Bidenit dukej se shënonin një “shkelje” të strategjisë së qëllimshme të mbajtur prej kohësh të Uashingtonit të “paqartësisë strategjike” mbi Tajvanin.
Shtëpia e Bardhë nuk vonoi dhe tha se deklaratat nuk pasqyrojnë një ndryshim në politikë.
Duke folur në Forumin Ekonomik Botëror të Davos-it, Kissinger tha: “Një konfrontim i drejtpërdrejtë duhet të shmanget dhe Tajvani nuk mund të jetë thelbi i negociatave midis Kinës dhe Shteteve të Bashkuara.”
Më herët të hënën, Biden u tha gazetarëve në një konferencë të përbashkët shtypi me kryeministrin japonez Fumio Kishida se SHBA do të ishin të përgatitura për të mbrojtur Tajvanin nëse Pekini e pushton.
Komentet nxitën një reagim të ashpër nga Ministria e Jashtme e Kinës, e cila shprehu “pakënaqësi dhe kundërshtim” ndaj komenteve.
Sipas politikave shumëvjeçare, SHBA-ja e pranon diplomatikisht qëndrimin e Kinës se ka vetëm një qeveri kineze.
Megjithatë, SHBA-ja ruan gjithashtu një marrëdhënie “të fortë jozyrtare” me Tajvanin dhe Uashingtoni furnizon me pajisje ushtarake ishullin në përputhje me Aktin e Marrëdhënieve me Tajvanin e vitit 1979.
Ky akt nuk kërkon që SHBA të ndërhyjë ushtarakisht për të mbrojtur Tajvanin nëse Kina pushton, por siguron që ishulli të ketë burimet për të mbrojtur veten dhe për të penguar Pekinin .
Kina pretendon se Tajvani është pjesë e territorit të saj dhe ka ushtruar presion mbi ishullin demokratik për të pranuar sundimin e tij.
“Për thelbin e negociatave, është e rëndësishme që Shtetet e Bashkuara dhe Kina të diskutojnë parimet që ndikojnë në marrëdhëniet kundërshtare që lejojnë të paktën një hapësirë për përpjekje të përbashkëta,” tha Kissinger.
“Është e rëndësishme për paqen e përgjithshme të botës që Shtetet e Bashkuara dhe Kina të rregullojmë marrëdhëniet,” shtoi ai.
Kissinger, i cili mbush 99 vjeç të premten, shërbeu si sekretar i shtetit dhe këshilltar për sigurinë kombëtare nën udhëheqjen e presidentëve republikanë Richard Nixon dhe Gerald Ford në vitet 1970.
Një figurë politike e diskutueshme dhe polarizuese, Kissinger ndikoi në disa nga ndryshimet më të rëndësishme në politikën e jashtme të SHBA-së gjatë kohës së tij në detyrë. Kjo përfshinte “shkrirjen” e marrëdhënieve të SHBA-së me Kinën.
Burimi: CNBC
Përktheu dhe përshtati: Konica.al
VAZHDO TË LEXOSH MË TEPËR PËR TEMËN
Biden flet për të vendosur drejtësi në botë, a do t’ia dalë ai?
Biden ka nisur veprimet në politikën e jashtme
Biden është i ashpër në fjalë por i dobët në vepra për politikën…
