Sekretari i Përgjithshëm i NATO-s, Jens Stoltenberg është takuar me kryeministren finlandeze dhe ka folur me presidentin e Turqisë, ndërsa ai kërkon të kapërcejë rezistencën turke ndaj Finlandës dhe Suedisë që t’i bashkohen aleancës.
Stoltenberg, i cili vizitoi Uashingtonin këtë javë, shkroi në Twitter të premten vonë se ai u takua me kryeministren finlandeze Sanna Marin ndërsa ishte atje dhe diskutoi “nevojën për të adresuar shqetësimet e Turqisë dhe për të ecur përpara” me aplikimet për anëtarësim finlandez dhe suedez.
Lufta e Rusisë në Ukrainë i shtyu vendet nordike të aplikojnë për t’u anëtarësuar në NATO, por presidenti turk Rexhep Tajip Erdogan akuzon Suedinë dhe Finlandën se mbështesin militantët kurdë të konsideruar nga Turqia si terroristë.
Stoltenberg tha se ai kishte një “telefonatë konstruktive” me Erdoganin, duke e quajtur Turqinë një “aleat të vlefshëm” dhe duke vlerësuar përpjekjet turke për të ndërmjetësuar një marrëveshje për të siguruar transportin e sigurt të furnizimeve me drithëra nga Ukraina në mes të mungesës globale të ushqimit të shkaktuar nga pushtimi rus. Stoltenberg shkroi në Twitter se ai dhe Erdogan do të vazhdojnë dialogun e tyre, pa dhënë detaje.
Zyra e Erdoganit lëshoi një deklaratë në të cilën tha se presidenti kishte theksuar se Suedia dhe Finlanda duhet “të bëjnë të qartë se kanë ndaluar së mbështeturi terrorizmin”, kanë hequr kufizimet e eksportit të mbrojtjes ndaj Turqisë dhe janë “gati të tregojnë solidaritet të aleancës”.
Shtetet nordike, ndër vendet e tjera, vendosën kufizime në shitjen e armëve pas inkursionit ushtarak të Turqisë në 2019 në Sirinë veriore.
Përpjekjet diplomatike të shefit të NATO-s erdhën përpara një mbledhjeje të zyrtarëve të lartë nga Suedia, Finlanda dhe Turqia javën e ardhshme në Bruksel, ku ndodhet NATO, për të diskutuar kundërshtimin e Turqisë ndaj aplikimeve.
VAZHDO TË LEXOSH MË TEPËR PËR TEMËN
Turqia kundërshton anëtarësimin e Finlandës dhe Suedisë në NATO
Pse Erdogan po pengon planet e NATO-s?
