Presidenti turk Recep Tayyip Erdogan ka thënë sot gjatë një konference për media në Beograd, se është i kënaqur me marrëveshjen e arritur mes Kosovës dhe Serbisë sa i përket kalimit të kufijve me letërnjoftim.
Duke folur për tensionet që ishin ngritur para dialogut mes Prishtinës dhe Beogradit, presidenti turk tha se Ankaraja zyrtare mbështet bisedimet dhe se i vjen mirë që janë ulur tensionet, raporton Telegrafi.
Para homologut serb, Aleksandar Vuçiç, Erdogan theksoi edhe një herë qëndrimin e Turqisë sa i përket njohjes së Kosovës – duke thënë se është i kënaqur që Kosova dhe Serbia kanë arritur marrëveshje për letërnjoftimet.
“Jemi shumë të kënaqur me arritjen e marrëveshjes për kalimin e kufijve me letërnjoftim mes Kosovës dhe Serbisë. Sa i përket targave të automjeteve – shpresoj që do të arrihet marrëveshje në një të ardhme të afërt – si dhe për shumë çështje tjera”, shtoi Erdogan.
Duke iu përgjigjur pyetjeve të gazetarëve se kush është fajtor për krizën në Evropë dhe botë, Erdogan tha se shteti i tij ndjek politikën e baraspeshimit – por theksoi se Perëndimi ka një politikë korrekte.
“Ne në Turqi kemi ndjekur gjithmonë një politikë ekuilibri midis Rusisë dhe Ukrainë. Këtë do të vazhdojmë ta bëjmë edhe në të ardhmen. Ka disa vende në Perëndim që besojmë se nuk e kanë qasjen e duhur. Ekziston një politikë që bazohet në nxitje dhe një politikë të tillë po e ndjekë Perëndimi. Nuk ka fitues në këtë luftë, vetëm numër të madh të jetëve të humbura. Nuk duket se lufta midis Rusisë dhe Ukrainës do të përfundojë së shpejti. Mendoj që nuk do të duhej të nënvlerësohej Rusia, e cila ka ndalur shpërndarjen e gazit natyror. Çmimi është rritur për shkak të kësaj dhe të gjithë po përpiqen t’i mbijetojnë dimrit”, shtoi Erdogan.
VAZHDO TË LEXOSH MË TEPËR PËR TEMËN
BE do që mosmarrëveshjet Kosovë-Serbi të zgjidhen sipas modelit të Tirolit të Jugut
“Dokumentet e Kosovës i pranojmë…, pavarësinë nuk e njohim”
