Zëvendëskryeministri kinez Wang Qishan do të marrë pjesë në funeralin e Mbretëreshës Britanike Elizabeth II me ftesë të qeverisë britanike, njoftoi sot Ministria e Jashtme kineze.
BBC raportoi se delegacioni kinez që do të vizitojë Londrën për funeralin e Mbretëreshës të hënën nuk do të lejohet të bëjë nderimet e tyre në arkivolin e saj.
Disa deputetë britanikë kanë shprehur shqetësimin për ftesën e zyrtarëve kinezë në funeralin e Elizabeth pasi Pekini vendosi sanksione ndaj kolegëve të tyre për kritikimin e situatës së të drejtave të njeriut në provincën Xinjiang të Kinës.
Zëdhënësja e Ministrisë së Jashtme kineze Mao Ning tha dje se nuk ishte vënë në dijeni për informacionin e BBC-së, por shtoi se “funerali shtetëror i mbretëreshës Elizabeth II është një ngjarje e rëndësishme për Mbretërinë e Bashkuar”.
“Pjesëmarrja e delegacioneve të huaja në ngjarje, pas ftesës së Mbretërisë së Bashkuar, është një shenjë respekti për Mbretëreshën dhe rëndësinë që i kushtohet marrëdhënieve me Mbretërinë e Bashkuar”, theksoi Mao.