Detaje të reja kanë dalë lidhur me arrestimin e Ruben Saraivës, portugezi i cili ekzekutoi biznesmenin Ardian Nikulaj në resortin e tij “Coral” në Shëngjin.
Saraiva u vu në prangat e policisë mbrëmjen e djeshme në Markok, një vend me të cilin Shqipëria nuk ka marrëveshje ekstradimi.
Ndërkohë, burime për mediat bëjnë me dije se ditën e sotme “Interpol Maroku” i ka dërguar një mesazh homologëve shqiptarë ku i kanë vënë në dijeni se Ruben Saraiva ndodhet në paraburgim.
“Lidhur me shtetasin Ruben Saraiva, i cili kërkohet nga ju për vrasje, a është kërkimi i vlefshëm? Nëse po, ju lutem na vini në dispozicion praktikën. Ai është arrestuar nga ne dhe po mbahet në paraburgim”, shkruhet në mesazhin e dërguar nga Interpol Maroku për autoritetet shqiptare.
Praktikisht ky është edhe mesazhi që informon palën shqiptare për arrestimin e të shumëkërkuarit dhe kërkon të dhëna për rrethanat e çështjes dhe arsyet se pse ai akuzohet nga shteti shqiptar.
Mësohet se Saraiva ka udhëtuar drejt Marokut te familjarët e tij duke ditur që vendi ynë nuk ka marrëveshje ekstradimi me këtë shtet.
Ndërsa sa i përket ekstradimit të Saraivës në vendin tonë bëhet me dije se Shqipëria do të përdorë të gjitha manovrat ligjore të konventave ndërkombëtare për të bindur shtetin afrikano-verior për të pasur një përgjigje pozitive ekstradimi. Një prej mënyrave që mund të ndiqet është ajo e shkëmbimit me një të burgosur maroken që mund të jetë arrestuar në vendin tonë.
Ruben Saraiva dyshohet se ka shkuar në Marok me dokumente false. Në momentin e arrestimit ai ka qenë i ulur vetëm në një lokal në kryeqytetin e Marokut, Rabat, ndërsa gjatë kontrolleve të ushtruara nuk i janë gjetur dokumente apo armë.
Ai kërkohet nga drejtësia shqiptare, pasi dyshohet se në bashkëpunim me katër shtetas britanikë të paguar nga Edmond Haxhia kanë organizuar vrasjen e Nikulajt.
VAZHDO TË LEXOSH MË TEPËR PËR TEMËN
Ekzekutimi i Ardian Nikulajt në Shëngjin, arrestohet dhe britanikja, Harriet Bridgeman
