Një luftë e plotë e NATO-s me Rusinë është “skenari më i keq” i Perëndimit, por është i mundur, sipas komandantit të forcave të armatosura të Republikës Çeke, pasi hendeku midis botës perëndimore dhe Moskës po zgjerohet me luftën e Kremlinit kundër Ukrainës.
Gjenerali Karel Rehka, shefi i shtabit të përgjithshëm të forcave të armatosura çeke, tha në një konferencë në parlamentin çek të hënën, se ushtritë e NATO-s duhet të ndërmarrin detyrën “thelbësore” të përgatitjes për konflikt të drejtpërdrejtë me Moskën.
“Ne e shohim luftën midis Rusisë dhe Aleancës së Atlantikut të Veriut si skenarin më të keq, por nuk është e pamundur”, tha Rehka.
“Është e mundur, Rusia aktualisht po shkon drejt një konflikti me Aleancën”, argumentoi ai. Rehka po ashtu e përshkroi mundësinë e një konflikti me Rusinë si “skenarin më të zi”.
“Mund të ndodhë dhe është e nevojshme të përgatitemi për të në plan afatgjatë”, tha ai, duke argumentuar se duhet të forcohet siguria kombëtare e vendit, duke i kushtuar vëmendje të veçantë varësisë nga furnizimet ruse me energji.
Sipas gjeneralit, zgjidhja është parandalimi, që NATO t’i tregojë Moskës se “nuk ia vlen sepse thjesht nuk mund të ketë sukses” në mposhtjen e rivalëve të saj perëndimorë përmes mjeteve ushtarake.
Moska e ka cilësuar pushtimin e saj katastrofik të Ukrainës si një sulm parandalues kundër NATO-s, të cilin e ka akuzuar prej kohësh për nxitjen e “rusofobisë” në vend, edhe pse Kremlini ndërhyri në politikën e brendshme të Ukrainës, aneksoi Krimenë dhe pushtoi pjesë të rajonit të Donbasit.
Zyrtarët e Kremlinit kanë pohuar se NATO po përgatiste Ukrainën si një pikënisje për agresion kundër Rusisë, megjithëse aleanca e ka refuzuar vazhdimisht.