“Mos kërkoni të drejta, mjafton që nuk po ju vrasim” ky është mesazhi që i ka dërguar sipas mediave në Kosovë, kryeministrja serbe Ana Bërnabiç, shqiptarëve të Luginës së Preshevës nga Forumi Strategjik i Bledit në Slloveni.
Për këtë episod ka reaguar edhe deputeti i vetëm shqiptar në Parlamentin e Serbisë, Shaip Kamberi.
Deputeti shqiptar në Parlamentin serb i është kundërpërgjigjur deklaratave të kryeministres së Serbisë Ana Brnabiç se shqiptarët në Luginë të Preshevës kanë të drejta dhe se ata askush nuk i vret.
Kamberi tha se deklarata e kryeministres së Serbisë “është vazhdimsi e politikës zyrtare të standardeve të dyfishta të Serbisë për trajtimin e pakicave, dhe mohimit të të drejtave elementare të pakicave brenda territorit të vet, ndërkohë që për pakicën e vet në Kosovë, tenton të ndërtojë standarde që nuk ekzisojnë në asnjë shtet tjetër”.
Më tej Kamberi i ka listuar diskriminimet dhe dhunën me të cilën janë përballur shqiptarët e Luginës vite me radhë.
“Vetëm në periudhën e bombardimeve të NATO-së më 1999, në komunën e Preshevës, territor nën kontrollin absolut të forcave serbe të sigurisë, janë vrarë 11 civil shqiptarë, për të cilët nuk ka dhënë llogari askush. Në Komunën e Bujanocit, gjatë vitit 2000, janë vrarë 13 civilë tjerë. Qindra shqiptarë tjerë, janë keqtrajtuar: rrahur e plaçkitur nga forcat serbe të sigurisë, pa u dënuar askush”, ka thënë ai.
Kamberi ka theksuar se “Serbia mbetet i vetmi vend në Ballkanin Perëndimorë, në të cilën, me ligj është ndaluar përdorimi publik i simbolit kombëtar”.
VAZHDO TË LEXOSH MË TEPËR PËR TEMËN
Debat në parlamentin serb për ndryshimet kushtetuese, deputeti shqiptar: Pse nuk përmendni varret masive në Serbi?
“Kosova është shtet dhe pikë, të nervozohet kush të dojë”
