“Spastrimet” e presidentit Volodymyr Zelensky po tronditin Ukrainën dhe kjo është një shenjë se kundërofensiva ukrainase nuk po shkon aq mirë sa dikush do të donte të besonte.
Të gjithë zëvendësministrat e mbrojtjes të qeverisë së Kievit u hoqën nga postet e tyre: ky operacion u shkaktua nga dorëheqja e Oleksii Reznikov, ish-kreu i ministrisë.
Si rezultat, zëvendësministrat Volodymyr Gavrilov, Rostyslav Zamlynskyi, Hanna Malyar dhe Denis Sharapov u shkarkuan.
Për më tepër, u shkarkua edhe ish-futbollisti Andrii Shevchenko, i cili ishte në krye të integrimit evropian, Vitaly Deinega nga zhvillimi dixhital, dhe Kostyantyn Vashchenko, sekretar shtetëror i Ministrisë së Mbrojtjes.
Ky spastrim dëshmon për vështirësitë e kundërofensivës së Ukrainës. “Nuk është shumë shpejt, – pranoi Zelensky, – por ushtria nuk duhet t’i japë pushim Putinit.
Ne kemi iniciativën, ky është një avantazh. Ne ndaluam ofensivën ruse dhe shkuam në kundërofensivë. Nuk mund të humbim kohë. Aty ku nuk shkojmë dot me automjet të blinduar, shkojmë me avion. Nëse nuk mund të fluturojmë, dërgojmë drone. Ne nuk duhet t’i japim Putinit pushim.”
Këtë javë presidenti ukrainas do të jetë në Nju Jork për t’iu drejtuar Asamblesë së Përgjithshme të Kombeve të Bashkuara. Më pas ai do të shkojë në Uashington për të takuar presidentin e Shteteve të Bashkuara Joe Biden.
Në këto raste Zelensky do të përsërisë nevojën për një fitore totale ndaj Rusisë dhe do të kërkojë furnizime të mëtejshme, edhe pse ka marrë vazhdimisht gjatë këtyre muajve.
“Përparimi i kësaj lufte,- parashikon Mykhailo Podolyak, këshilltar i presidentit, – do të përshpejtohet nëse Ukraina ka mjaftueshëm armë”.
