Deputeti i Partisë Demokratike, Dashnor Sula është shprehur kundër përfshirjes së Partisë Demokratike në çështjen për të cilën sot po hetohet ish-kryeministri Sali Berisha.
Sula u shpreh se opozita nuk do të bëhet mburojë e asnjë politikani duke nënkuptuar këtu, edhe vetë Berishën.
Ai thotë se ndërsa mund të ketë “persona të caktuar që kanë interesa të sulmojnë ndonjë politikan apo një tjetër, kjo nuk do të thotë që e gjithë forca politike të përfshihet në këtë luftë.”
Duke u shprehur kundër sulmeve ndaj Prokurorisë së Posaçme, Sula shton se PD nuk duhet të përfshihet në këtë debat.
“Unë vazhdoj t’i mbështes organet e drejtësisë dhe nuk jam dakord me asnjë lloj emërtimi edhe në kohën kur Rama në Asamblenë e PS-së sulmoi SPAK-un. Jam kundra çdo lloj epiteti, çdo lloj gjuhe. Unë nuk do të jem mburojë e asnjë politikani në asnjë lloj rasti. Nëse e fusim në kanalet politike, humbet sensi dhe e drejta. Mund të ketë persona të caktuar që kanë interesa të sulmojnë ndonjë politikan apo një tjetër. Kjo nuk do të thotë që e gjithë forca politike të përfshihet në këtë debat dhe në këtë luftë. Qëndrimi i Zt. Bardhi dhe i joni është që nuk i bëhemi mburojë asnjë personi. Nëse nesër fillon një hetim për një politikan të opozitës që mund të ketë shkelur ligjin, atëherë nuk preket asnjëherë opozita dhe kështu që i bie që edhe pozita e sotme kur të jetë nesër në opozitë të mos preket. Nëse Berisha bën betejë për transparencë, ne duhet ta mbështesim”, tha deputeti Sula në studion e News 24.
Pyetjes së bërë nëse duhet ta përfshijë Partinë Demokratike, deputeti Sula ishte i qartë: Jo!
Sa i përket masës së sigurisë të lëshuar nga GJKKO për ihs-kryeministrin, Sula shprehet se ka patur një nxitim.
Sipas tij, “gjëja e parë kur një gjykatë shikon është respektimi i procedurës.”
“Shprehja që qarkullon nëpërmjet juristëve është që dy juristë nuk i gjen në një mendje asnjëherë. Ligji ka interpretim gjithmonë. Por siç e lexoj unë ligjin dhe pa dashur të ndikohem nga Berisha, them se ka një nxitim nga gjykata se si lexohet ligji. Prokurori dhe gjykatësi udhëhiqet nga kodi i procedurës penale ose civile. Në çfarëdo lloj gjykate madje edhe në Strasburg, gjëja e parë kur një gjykatë shikon është respektimi i procedurës. Nëse kemi shkelje të procedurës nuk i hyn fare themelit të çështjes dhe kjo ndodh në çdo proces. Në rastin konkret, nëse do të rrijë në këtë ‘status quo’ kjo është e goditshme si çështje në themel. Ky nxitim i tillë nuk kishte pse të ndodhte.
Ne kemi deklaruar se do të votojmë pro çdo lloj kërkese që vjen nga Prokuroria. Në rastin konkret, Kodi i Procedurës Penale, është i qartë. Ndalimi i pasaportës të kërkon autorizimin nga Parlamenti. Ndryshimet janë bërë në vitin 2012 dhe kemi kërkuar që të mos kishte fare imunitet deputeti. Sot organi hetues ka të drejtë të gjurmojë deputetin. Për kontrollin e banesës dhe masën e sigurimit, këtu është anashkaluar Kuvendi. Nuk e di pse është anashkaluar kjo. Ligjvënësi është parashikuar që edhe në rastet kur Parlamenti nuk i jep autorizim, përsëri në bazë të nenit 289, organi hetues ka të drejtë të vazhdojë hetimin”, theksoi ai.
Nga ana tjetër, ky hetim, sipas deputetit të PD-së ka vënë në vështirësi edhe vetë kryeministrin Rama.
“Kjo është një gjë që edhe Ramën vetë e ka vënë në siklet sepse është hera e parë që po hetohet një vendim kolegjial, një VKM. Çka do të thotë se kjo mund të bëhet edhe nesër në krye të detyrës. Pastaj ka kanë këllqe, është tjetër gjë. Rama rehat është me këtë status quo, me zt.Berisha, me zt.Meta dhe zt.Basha, sepse i ka mundur disa herë”, shtoi deputeti i opozitës.
VAZHDO TË LEXOSH MË TEPËR PËR TEMËN
“Berisha do ekstradohet në SHBA, rrezikon edhe Basha po nuk e shkëputi nga partia”
‘Luftë’ në PD, dhunë në protestën e Berishës, ndërhyn policia
