Bashkimi Evropian arriti një marrëveshje për “Paktin për Migracionin dhe Azilin”.
Negociatorët nga PE dhe KE arritën një marrëveshje politike mëngjesin e djeshëm.
“Patëm sukses”, shkroi komisionerja e BE-së për Punët e Brendshme, Ylva Johansson. 5 ligjet e miratuara nga presidenca dhe parlamenti spanjoll kanë të bëjnë me të gjitha fazat e menaxhimit të azilit dhe migracionit, duke filluar nga kontrolli i migrantëve të paligjshëm kur ata mbërrijnë në BE, mbledhja e të dhënave biometrike, procedurat për bërjen dhe përpunimin e kërkesave për azil dhe rregullat e përcaktimit se cili shtet anëtar është përgjegjës për trajtimin e kërkesave për azil dhe bashkëpunimin dhe solidaritetin ndërmjet shteteve anëtare për trajtimin e situatave të krizës.
Rregullat, pasi të miratohen, do ta bëjnë sistemin evropian të azilit më efikas dhe do të rrisin solidaritetin midis shteteve anëtare, duke bërë të mundur uljen e barrës mbi ato vende ku mbërrijnë shumica e emigrantëve.
Duke folur në konferencën për shtyp të mëngjesit të djeshëm, presidentja e Parlamentit Evropian Roberta Metsola tha se ishte një “ditë vërtet historike”. Presidentja e Komisionit Evropian, Ursula von der Leyen, tha se ky pakt do të sigurojë një marrëveshje efektive evropiane për këtë sfidë.
Por duke reaguar ndaj marrëveshjes politike për paktin e BE-së për migracionin dhe azilin, grupi i krahut të majtë në Parlamentin Evropian tha se ishte një “ditë e errët për BE-në”.
Të Gjelbrit besojnë se marrëveshja është e pazbatueshme, duke përmendur shqetësimet për të drejtat e njeriut si dhe se përforcon idetë e vjetruara se si të trajtohet emigracioni dhe nuk merr parasysh realitetin.
