“Pyet mjekun” është rubrika më e re, një platformë që bën të mundur kontaktin ndërmjet mjekut dhe pacientit.
Nëse keni ndonjë pyetje, për gjithçka që ju shqetëson në shëndetin tuaj, këtu do të merrni përgjigje nga mjekë me eksperiencë, pa rezervime takimesh dhe duke shmangur radhët e gjata.
Pacienti: Çfarë e shkakton infeksionin e sinuseve?
Mjeku: Sinuset janë disa çifte të hapësirave ajrore të vendosura në hapësirën e kokës. Sipas lokalizimit, ato ndahen në: maksilare/ nofull; frontale/ballore; etmoide / në rrënjën e hundës ndërmjet syve; sfenoide / pas hundës në mes të kokës. Sinusiti është një inflamacion i mukozës së sinuseve paranazale. Këto infeksione zakonisht ndodhin së bashku me infeksionet e hundës / rinitit / dhe për këtë arsye shpesh përdoret termi rinosinusit. Ju mund ta dini se viruset, bakteret dhe kërpudhat janë arsyet e mundshme që shkaktojnë një infeksion të sinusit – por nuk janë të vetmit shkaktarë.
Shkaqe të tjera që kontribuojnë në zhvillimin e një infeksioni të sinusit përfshijnë alergjitë, çështjet e strukturës së sinusit si polipet dhe faktorët e stilit të jetesës si pirja e duhanit e faktorë të tjerë.
Viruset
Shumica e infeksioneve të sinuseve fillojnë me një të ftohtë. Viruset shkaktojnë ftohje dhe mund të bëjnë që indet e hundës të ënjten, duke bllokuar hundët.
Nëse një virus shkakton infeksionin e sinusit tuaj, antibiotikët nuk do të ndihmojnë pasi këto barna vrasin vetëm bakteret. Megjithatë, ju mund të përdorni trajtime për të ndihmuar, të tilla si sprej steroide hundore, dekongestantë oralë dhe/ose pastrim të hundëve.
Alergjitë
Për shkak se inflamacioni mund të bllokojë pasazhet e hundës dhe të parandalojë pastrimin e tyre, alergjitë shpesh shoqërohen me infeksione të sinusit. Nëse jeni të prirur ndaj alergjive, shmangni gjërat që shkaktojnë reaksione alergjike, të tilla si marimangat e pluhurit, zbokthi i kafshëve shtëpiake dhe myku. Antihistaminet dhe sprajet e hundëve me recetë ose pa recetë mund të zvogëlojnë inflamacionin kronik në sinuset dhe mukozën e hundëve.
Bakteret
Ndërsa shumica e shkaqeve infektive të infeksioneve të sinusit janë në të vërtetë virale, nëse zhvilloni sinusit bakterial, ai mund të trajtohet me antibiotikë pas konsultimit me një ofrues të kujdesit shëndetësor.
Polipet e hundës
Polipet e hundës janë rritje të vogla beninje që zhvillohen nga hunda ose indet e sinusit dhe mund të shkaktojnë bllokimin e zgavrave të sinusit, duke parandaluar rrjedhjen e mukusit dhe duke shkaktuar infeksion të sinusit. Këto rritje gjithashtu mund të bllokojnë në rrugët e frymëmarrjes dhe të shkaktojnë dhimbje koke.
Polipet trajtohen me sprej steroide nazale. Nëse trajtimet me steroide nuk funksionojnë, mund të jetë e nevojshme kirurgjia.
Ndotësit irritues dhe phuhuri
Alergjenët dhe ndotësit në ajër – si pluhuri – mund të luajnë një rol në zhvillimin e sinusitit. Shmangni sa më shumë që të jetë e mundur këta irritues për të reduktuar shfaqjen e infeksioneve të sinusit, veçanërisht nëse keni alergji ose astmë.
Kërpudhat
Ndërsa infeksionet kërpudhore të sinusit mund të ndodhin tek individë të shëndetshëm, ato janë më të zakonshme tek njerëzit me sistem imunitar të dobët. Kur sistemi juaj imunitar është i prekshëm, kërpudhat mund të rriten në mjedise të lagështa dhe të errëta si sinuset tuaja. Kërpudha më e zakonshme e lidhur me sinusitin është Aspergillus.
Infeksionet fungale të sinusit variojnë gjerësisht nga irrituese të lehta deri te jashtëzakonisht të rënda dhe potencialisht fatale. Trajtimi gjithashtu do të ndryshojë gjerësisht në varësi të llojit të kërpudhave të përfshira dhe nëse infeksioni është akut apo kronik.
Anatomia e hundës
Problemet strukturore që lidhen me hundën mund të bllokojnë hapjet në sinus, duke parandaluar kullimin e mukusit. Për shembull, një septum i devijuar – kur pjesa qendrore e hundës zhvendoset në njërën anë – dhe adenoidet e zmadhuara, masat e indeve në rrugët e frymëmarrjes, gjithashtu shoqërohen shpesh me infeksione kronike të sinusit. Kirurgjia mund të jetë e nevojshme për të korrigjuar këto anomali.
Nëse keni edhe ju pyetje, dhe doni të merrni një përgjigje të shpejtë nga mjekët e “spitalit tonë online”, klikoni këtu. Identiteti juaj do të mbetet anonim.
