E premtja duhet të ishte një ditë normale pune, por nuk ndodhi kështu pasi një incident i rëndë u shënua rreth orës 15:30 dhe shkaktoi dy të vdekur dhe shtatë të plagosur, mes tyre edhe deputeti i PS, Bujar Çela.
Roland Hoxha dhe i biri, Elidion ishin duke punuar në vinç ku me ndihmën e tij ngrinin 2 bombola oksigjeni me të cilat po kryenin saldime në pjesën e tarracës. Dyshohet se gjatë punës një bombol u shkëput nga vinçi dhe u përplas në tokë duke shkaktuar një shpërthim që shkatërroi gjithçka dhe mori jetën e të dyve.
Nga fuqia shpërthyese u shkëputën telat e tensionit të lartë 110 kv që kalonin sipër magazinës që po ndërtohej nga deputeti i Partisë Socialiste prej 2 mandatesh në Lushnje Bujar Çela, i cili mbeti i plagosur së bashku me shtatë persona të tjerë të cilët kanë qenë duke punuar në magazinën e tij. Të dëmtuarit u transportuan në spital për ndihmë mjekësore, ndërsa për manovratorin e vinçit Roland Hoxha ndërroi jetë në vendngjarje dhe i biri Elidion, i cili ndërroi jetë 2 orë më vonë. Për ta ishte dita e parë e punës ne këtë kantier qe rezultoi dhe e fundit.
Të plagosurit janë transportuar në spitalin e Tiranës: Sokol Lumi dhe deputeti socialist Bujar Çela. Ndërkohë në Lushnjë janë të lënduarit Sajmir Korreshi, Ilia Sota, Lunedi Golemi, Eriget Gorovelli dhe Ervis Sharka.
Magazina ku ata po punonin u shkatërrua plotësisht ndërkohë që dëme të konsiderueshme morën edhe bizneset të tjera në ketë zonë industriale si edhe disa banesa.
Zona ku ndodhi shpërthimi u konservua si vendngjarje dhe policia nisi hetimet. Ekspertët zjarrfikës, forcat xhenio, hetuesit dhe ekspertët do të rikthehen sërish në vendngjarje për të bërë një këqyrje me dritë natyrale.
Hetimet do të kryhen edhe për kriteret e ndërtimit të këtij kapanoni metalik poshtë linjës së tensionit të lartë 110 kv i cili sipas ekspertëve krijon induksion në një distancë deri në 3 m./TCH
VAZHDO TË LEXOSH MË TEPËR PËR TEMËN
