Së fundmi bëhet e ditur se Google po merr në konsideratë mundësinë që të tarifojë përdoruesit për rezultatet e kërkimit në internet të cilësuar “premium” të mundësuar nga inteligjenca artificiale (AI). Gjiganti i teknologjisë thuhet se është duke eksploruar disa ide rreth përdorimit të teknologjisë, duke bërë të mundur përfshirjen e mjeteve të zgjeruara të kërkimit si pjesë e shërbimeve të tij premium.
Motori kryesor i kërkimit i Google do të mbetet i lirë për t’u përdorur sipas propozimeve por me përmbajtje shtesë të disponueshme për ata që paguajnë një tarifë, thanë burimet për Financial Times. Sipas raportit, reklamat do të vazhdojnë të shfaqen së bashku me rezultatet e kërkimit, madje edhe për abonentët.
Më shumë se një miliard njerëz përdorin motorin e kërkimit çdo muaj, sipas vlerësimeve. Google tashmë tarifon për disa veçori të tilla si hapësirën shtesë të ruajtjes dhe shërbimin e tij “AI Premium”, i cili siguron akses në asistentin e tij të ri Gemini AI në Gmail dhe Docs. Por kjo do të shënonte herën e parë që ndonjë nga produktet kryesore të kompanisë do të ishte e disponueshme nëpërmjet pagesave.
Financial Times tha se ishte informuar për këto propozime nga tre burime në Google. Ai tha se inxhinierët kanë punuar në zhvillimin e mjeteve të përmirësuara të AI, por drejtuesit ende nuk kanë vendosur nëse ose kur do të lançojnë këtë si funksion. Një zëdhënës i kompanisë tha për Sky News se:
Ne nuk po punojmë ose nuk po shqyrtojmë një përvojë kërkimi pa reklama. Siç kemi bërë shumë herë më parë, ne do të vazhdojmë të ndërtojmë aftësi dhe shërbime të reja premium për të përmirësuar ofertat tona të abonimit në Google.
Gjithçka thuhet se vjen mes konkurrencës intensive midis firmave të teknologjisë mbi AI dhe mënyrën e përdorimit të saj. Disa komentues akuzojnë Google se po lufton për të vazhduar me rivalët si ChatGPT.Muajin e kaluar doli se kompania kishte vendosur të kufizonte chatbotin e saj të inteligjencës artificiale Gemini që t’u përgjigjej pyetjeve të lidhura me zgjedhjet në disa vende për shkak të shqetësimeve në lidhje me informacionin që u jepej përdoruesve.
