Agjenda e dialogut mes Kosovës dhe Serbisë mbetet e pandryshuar, me theks të veçantë në nevojën urgjente për zbatimin e Marrëveshjes së Ohrit ka thënë zëdhënësi i Bashkimit Evropian, Peter Stano, teksa ka komentuar takimin e nesërm në nivel kryenegociatorësh në Bruksel.
Stano ka theksuar se do të jetë e rëndësishme të ruhet “koreografia e zakonshme” e dialogut, ndërsa shtoi se zhvillimi i një takimi trilateral varet shumë nga gatishmëria e të dyja palëve për të u angazhuar në një format të tillë.
“Agjenda është siç ishte edhe në të kaluarën, që duhet urgjentisht të fillohet me zbatimin e Marrëveshjes së Ohrit, dhe nevoja që të dyja palët më në fund të arrijnë të merren vesh për një përparim në dialog. Çfarë formati dhe si do të vazhdojmë nesër? Ne gjithmonë përpiqemi të ruajmë koreografinë e zakonshme, por siç e dini shumë mirë, nëse do të ketë një takim trilateral, kjo varet shumë nga gatishmëria e të dyja palëve për t’u takuar në një format të tillë trilateral”, ka thënë Stano.
Teksa vlen të ceket që më 17 shtator Kryenegociatori i Kosovës, Besnik Bislimi, dhe ai i Serbisë, Petar Petkoviq, kanë zhvilluar dy herë bisedime të ndara me të dërguarin e posaçëm të BE-së për dialogun, Miroslav Lajçak, i cili nuk arriti t’i bindë ata për një takim trepalësh në Bruksel.
Herën e fundit kur është zhvilluar një takim trepalësh ka qenë takimi i 2 korrikut të këtij viti. Megjithatë, pas takimit palët kishin akuzuar njëra-tjetrën për “mungesë të gatishmërisë për dialog”.
VAZHDO TË LEXOSH MË TEPËR PËR TEMËN
“Qeveria e re ta vazhdojë dialogun me Serbinë”
Analisti zbulon temën që do të diskutohet më 15 qershor
Asociacioni, sfidë edhe për qeverinë në ardhje
