Presidenti rus, Vladimri Putin ka thyer heshtjen për lëvizjet e fundit në fushën e betejës. Ai foli për sulmet e mëngjesit të sotëm të kryera në qytetin qendror të Ukrainës, Dnipro, ku u përdorën raketa balistike me rreze të mesme veprimi të cilat mund të mbajnë edhe koka bërthamore.
Putin deklaroi se ky sulm ishte një përgjigje ndaj përdorimit të armatimit me rreze të gjatë amerikane dhe britanike nga forcat ukrainase, duke dërguar kështu një paralajmërim të qartë ndaj Perëndimit se përshkallëzimi do të sjellë pasoja. Ai pranoi se Rusia kishte testuar një raketë hipersonike jo bërthamore, test i cili sipas tij doli i suksesshëm.
“Në përgjigje të përdorimit të armatimit me rreze të gjatë amerikane dhe britanike më 21 nëntor të këtij viti, forcat e armatosura ruse kryen një sulm të kombinuar në një nga objektet e kompleksit ushtarako-industrial të Ukrainës. Në kushte luftarake, u krye një provë e një të sistemeve më të fundit të raketave me rreze të mesme veprimi, në këtë rast, me një version hipersonik jo-bërthamor të një rakete balistike, testi ishte i suksesshëm”, raportohet të ketë thënë Putin.
Më tej presidenti rus, deklaroi se sulmi i mëngjesit të sotëm kishte si synim një fabrikë armatimi ukrainas në qytetin e Dnipropetrovsk.
“Një nga komplekset industriale më të mëdha të njohura që nga epoka sovjetike është goditur në territorin e Ukrainës, në qytetin e Dnipropetrovsk. Ajo është ende duke prodhuar raketa dhe armatime të tjera”, shton ai.
Komentet e tij erdhën disa orë pasi Kievi akuzoi Rusinë për përdorimin e një rakete balistike ndërkontinentale për herë të parë në histori mes një sulmi më të gjerë raketor gjatë natës në qytetin e Dnipro. Zyrtarët perëndimorë cituan më vonë në raportet e mediave, kundërshtuan pretendimin e Kievit, duke thënë se sulmet gjatë natës në Ukrainë kishin përdorur vetëm raketa balistike.
“E përsëris, testimi luftarak i sistemit raketor Oreshnik po kryhet nga ne në përgjigje të veprimeve agresive të NATO-s kundër Rusisë”, tha Putin.
Putin paralajmëroi Perëndimin se Moska mund të godasë fabrikat ushtarake të çdo vendi, armët e të cilit janë përdorur kundër Rusisë. Ai tha gjithashtu se sulmet ndaj Rusisë me armë perëndimore nuk do të ndryshojnë rezultatin e “operacionit special” të Rusisë dhe se Moska do të përgjigjet në mënyrë simetrike ndaj çdo përshkallëzimi.
“Ne e konsiderojmë veten të justifikuar në përdorimin e armëve tona kundër objektivave ushtarake në ato vende që lejojnë përdorimin e armëve të tyre kundër objekteve tona. Në rast të përshkallëzimit të veprimeve agresive, ne do të përgjigjemi me vendosmëri dhe në përputhje me rrethanat”, vijoi ai.
Putin lëshoi kërcënimin e frikshëm duke thënë se në momentin që do të përdorë sistemin e raketave Oreshnik me mbushje të plotë në territorin ukrainas, do të lëshojë një paralajmërimin për arsye humanitare që qytetarët të largohen.
“Sigurisht, kur zgjedhim objektiva për sisteme si Oreshnik në territorin ukrainas, si një masë e nevojshme dhe hakmarrëse, ne do të nxisim paraprakisht civilët dhe qytetarët e kombeve mike të pranishme në ato zona që të evakuohen. Ne do ta bëjmë këtë hapur dhe publikisht, për arsye humanitare, pa pasur frikë nga ndonjë kundërshtim nga armiku, i cili gjithashtu do të marrë këtë informacion. Pse nuk ka frikë? Sepse nga sot nuk ka asnjë mjet për t’iu kundërvënë armëve të tilla”, tha Putin duke shtuar se Oreshnik është në gjendje të arrijë objektivat me një shpejtësi prej 2.5 deri në 3 kilometra në sekondë.
VAZHDO TË LEXOSH MË TEPËR PËR TEMËN
A e kemi pranë luftën bërthamore?!
A e ka filluar Rusia tashmë Luftën e Tretë Botërore?
