Në kujtimet e saj, ish-kancelarja gjermane Angela Merkel justifikoi edhe një herë politikën e saj ndaj Rusisë dhe kundërshtimin e saj ndaj anëtarësimit të Ukrainës në NATO, raportuan mediat gjermane të enjten. “Hyrja e një anëtari të ri në NATO nuk synon vetëm rritjen e sigurisë së anëtarit të ri, por duhet të merret parasysh edhe siguria e të gjithë aleancës,” citon e përjavshmja Die Zeit fragmente nga kujtimet e Angela Merkel me titull “Freiheit” “Liria”), e cila duhet të prezantohet javën e ardhshme. Pasazhi i referohet veçanërisht politikës së Angela Merkelit ndaj Rusisë, e cila është kritikuar shpesh ndërkohë, dhe lëshimit të supozuar të saj ndaj Vladimir Putinit.
Shumë besojnë se Rusia nuk do ta kishte sulmuar kurrë Ukrainën nëse Merkel do t’i jepte dritën jeshile kërkesës për anëtarësim të Ukrainës dhe Gjeorgjisë në takimin e NATO-s në Bukuresht në vitin 2008. “E kuptova plotësisht dëshirën e vendeve të Evropës Qendrore dhe Lindore për anëtarësim sa më shpejt në NATO. Megjithatë, me çdo zgjerim, vetë aleanca duhet të kishte rishikuar se si do të ndikonte në sigurinë, stabilitetin dhe efikasitetin e NATO-s”, shkruan ish-kancelarja në kujtimet e saj.
Ajo deklaroi se në atë moment në rastin e Ukrainës duhet të ishte marrë parasysh fakti që Rusia kishte vendosur flotën e saj të Detit të Zi në gadishullin e Krimesë, gjë që do të kishte sjellë “pasoja të paparashikueshme”. Merkel gjithashtu theksoi se në atë kohë vetëm një pakicë e ukrainasve mbështeti kërkesën për t’u anëtarësuar në NATO. Në kujtimet e saj, ish-kancelarja thekson se drita jeshile në parim për Ukrainën dhe Gjeorgjinë në samitin në Bukuresht nënkuptonte për Putinin një thirrje për të luftuar.
VAZHDO TË LEXOSH MË TEPËR PËR TEMËN
