Bashar al-Assad, njeriu që sundoi Sirinë për më shumë se dy dekada, ndodhet në Moskë, larg atdheut të tij nga i cili u largua pas marrjes në kontroll të Damaskut nga rebelët xhihadistë.
Arratisja e tij u bë në fshehtësi ekstreme, ku Rusia, konkretisht me vendim të Vladimir Putin, i dha azil politik.
Madje as vëllai i Assadit nuk ishte informuar për largimin e tij. Rusia, e cila luajti ndër vite një rol kyç në mbajtjen e Assadit në pushtet përmes ndërhyrjes ushtarake në 2015, pas rrëzimit të tij i ofroi një strehë të sigurt, duke siguruar që ai të mos binte në duart e rebelëve.
Zgjedhja e Moskës si destinacion nuk ishte e rastësishme. Rusia ka një histori të gjatë marrëdhëniesh me familjen Assad. Lidhjet e tyre datojnë që në vitet 1970, kur babai i tij, Hafez al-Assad, e futi Sirinë në sferën e ndikimit të Bashkimit Sovjetik.
Gjatë viteve që pasuan, kjo marrëdhënie u forcua, veçanërisht pas ndërhyrjes së Vladimir Putinit në luftën civile siriane.
Megjithatë, pavarësisht lidhjeve të forta midis dy shteteve, marrëdhënia personale e Assadit me Putinin ka mbetur e ftohtë dhe e mbushur me dyshime vitet e fundit.
Putin shpesh ka shprehur pakënaqësinë e tij për refuzimin e Assadit për të reformuar apo bashkëpunuar me opozitën e vendit.
Vendimi i Putinit për t’i ofruar strehim Asadit, pavarësisht dallimeve të tyre personale, duket se bazohet në arsye strategjike.
Udhëheqësi rus e sheh mbrojtjen e Assadit si një shenjë besnikërie ndaj aleatëve të tij dhe një sinjal për komunitetin ndërkombëtar se Rusia nuk po braktis partnerët e saj.
Përveç kësaj, Moska ofron kujdes mjekësor për gruan e Assadit, Asma , e cila vuan nga leuçemia.
Siç raporton Guardian , pavarësisht jetës luksoze që ka pasur në Siri, Assad dhe familja e tij pritet të jetojnë më të izoluar në Moskë.
Ndryshe nga videot që tregonin pallatet e tij të mbushura me makina dhe sende luksoze, jeta e tij në Rusi do të jetë mjaft e errët, nën vëzhgimin e ngushtë të autoriteteve ruse.
Ai besohet se ndodhet në një rezidencë të largët. The Guardian raporton se ndonëse i ndodhur në arrati, ka dyshime se Assad ka akses në pasurinë e tij që vlerësohet të jetë 2 mld dollarë.
E ardhmja e Assadit në Moskë është e pasigurt. Ndërsa i ofron mbrojtje të përkohshme, regjimi i Putinit gjithashtu përballet me sfida që mund të ndikojnë në sigurinë afatgjatë të Assadit. Vetë ai duket se e ka pranuar izolimin e tij, pa mundësi rikthimi politik.
Shembulli i tij të kujton liderët e tjerë të mërguar, si Viktor Janukoviç i Ukrainës, i cili ka jetuar i izoluar në Moskë që nga përmbysja e tij në 2014.
VAZHDO TË LEXOSH MË TEPËR PËR TEMËN
