Udhëheqësi i partisë kryesore opozitare të Turqisë është sulmuar në funeralin e një ushtari të vrarë në luftën kundër militantëve kurdë.
Kreu i Partisë Republikane Popullore (CHP), Kemal Kılıçdaroğlu, u dërgua në një shtëpi të afërt nga forcat e sigurimit për mbrojtjen e tij, tha agjensia shtetërore e lajmeve Anadolu.
Videoja e incidentit në mediat sociale tregoi një turmë që shtynte dhe po lëvizte rreth Kılıçdaroğlu ndërsa ai ecte përmes turmës. Partia e tij konfirmoi se Kılıçdaroğlu ishte sulmuar por nuk është bërë me dije nëse ai ishte plagosur.
Një grup i cili brohoriste me sloganin “Martirët nuk vdesin, atdheu nuk ndahet, mallkuar qoftë PKK-ja”, sulmuan me grushte dhe shqelma Kılıçdaroğlu-n.
Grupi protestoi kundër pranisë së Kılıçdaroğlu në funeralin në rrethin Çubuk të kryeqytetit, Ankara, dhe më pas e sulmoi, tha Anadolu.
Lideri opozitar i cili mbrohej nga njësia e operacioneve speciale, policia dhe xhandarmëria, pasi u mor nga zona, është dërguar në një shtëpi. Ndërsa përreth shtëpisë u krijua një rreth sigurie.
Celal Uzunkaya, drejtori i përgjithshëm i policisë, bashkë me pleqtë e fshatit me megafon u përpoqën që të qetësojnë grupin.
Më pas ministri i Mbrojtjes Kombëtare, Hulusi Akar arriti në shtëpinë ku ishte vendosur lideri opozitar. Gjithashtu edhe Akar kërkoi nga qytetarët që të qetësohen.
Kılıçdaroğlu pas rreth një ore u nxor nga shtëpia dhe u largua me anë të një automjeti të blinduar. Në të njëjtën kohë forcat e sigurisë morën masa sigurie.
“Janë marrë të gjitha masat e sigurisë në lidhje me Kılıçdaroğlu-n. Janë drejtuar forcat shtesë, tashmë nuk ka problem të sigurisë”, tha Vasip Şahin, guvernatori i kryeqytetit Ankara.
Prokurori i përgjithshëm i Ankarasë, Yüksel Kocaman, në deklaratën për AA tha se kanë nisur hetim në lidhje me rastin.
Ministri i Brendshëm, Süleyman Soylu, tha “Sigurisht që është i papranueshëm një incident i tillë në ceremoninë mortore të një martiri. Qoftë e kaluar”. Soylu tha se janë duke e ndjekur rastin.
Ndaj sulmit reagoi edhe ministri i Drejtësisë, Abdülhamit Soylu, duke theksuar se është e papranueshme që të ndodhë një incident i tillë në ceremoninë mortore të martirit.
“Mendoj se ata që e kanë bërë këtë janë brenda një provokimi. Jam i bindjes që të zbulohet edhe planifikimi pas kësaj”, tha kryeparlamentari i vendit Mustafa Şentop, gjatë vizitës së tij në Tekirdağ.
Zëdhënësi i Partisë AK, në pushtet, Ömer Çelik, ishte ndër zyrtarët e lartë që dënoi sulmin ndaj Kılıçdaroğlu-t. “Dënojmë çdo lloj akt të dhunës. Askush nuk ka të drejtë të dalë jashtë ligjit. Dhuna nuk është një mënyrë e kërkimit të së drejtës ose protestës. Përgjegjësit do të zbulohen dhe do të merren veprimet e nevojshme ligjore”, theksoi ai.
CHP muajin e kaluar fitoi në Ankara dhe Stamboll në zgjedhjet lokale. Partia e Drejtësisë dhe Zhvillimit (AKP) e Erdoganit po apelon për një përsëritje të zgjedhjeve të Stambollit duke përmendur parregullsi në garën kundër kandidatit të CHP, Ekrem İmamoğlu.
VAZHDO TË LEXOSH MË TEPËR PËR TEMËN
Erdogan ‘mbijetoi’, por humbi Ankaranë
A do të ketë Trump ‘mëshirë’ për Erdoganin?
Erdogan, i dobët por i pamposhtur
