Këngëtari i famshëm amerikan, Dr John ka ndërruar jetë në moshën 77 – vjeçare. Artisti i cili ishte gjashtë herë fitues i çmimeve ‘Grammy’ pësoi atak në zemër.
Muzikanti i lindur në New Orleans ndërroi jetë të enjten, sipas një mesazhi të postuar në llogarinë e tij zyrtare në Twitter.
Ylli i “Rock & Roll Hall of Fame” bënte muzikë duke kombinuar zhanret pop, jazz dhe rock and roll.
“Më 6 qershor, legjenda e muzikës Malcolm John Rebennack, Jr, i njohur si Dr John, vdiq nga një atak në zemër”, thuhet në një deklaratë.
Këngëtarja Debbie Harry, ishte një ndër artistët që shprehu ngushëllime për vdekjen e tij duke publikuar një foto së bashku me fituesin gjashtë herë të Grammy.
Ndër tjerash, John me sukses e luftoi varësinë e heroinës dhe në një nga albumet e tij ka folur për drogën, kohën në burg dhe përpjekjet për të riparuar marrëdhëniet me fëmijët e tij.
Këngëtari ishte i martuar dy herë.
