Partia Socialiste në Vaun e Dejës i ka quajtur absurde dhe qesharake deklaratat e PD përmes sekretarit të përgjithshëm, Gazmend Bardhi lidhur me parregullsitë në procesin e zgjedhjeve të 30 qershorit për Vaun Dejës.
Sekretari për marrëdhëniet me publikun në PS-në e Vaut të Dejës, Agron Ceka shprehet se procesi në bashkinë në fjalë ka qenë i rregullt duke hedhur poshtë kështu akuzat e PD.
Sipas Cekës, ditën e shtunë pas mesnate kanë mbërritur të gjitha materialet zgjedhore tek KZAZ 6 Bushat të cilat u dogjën pak ditë përpara 30 qershorit dhe të pranishëm kanë qenë vëzhguesit e OSBE ODIHR duke cilësuar të pavërteta pretendimet e PD se këto materiale mëngjesin e 30 qershorit kanë qenë në doganën e Hanit të Hotit.
Ceka thotë se ish kryebashkiaku i Vaut të Dejës, Zef Hila ka pranuar publikisht në media se sulmi për djegien e KZAZ 6 është bërë nga vetë PD duke qenë kontradiktor me deklaratën e sekretarit Bardhi se ai sulm ishte një skenar i PS.
Ceka hedh poshtë edhe pretendimet për anëtaren PS të KZAZ 6 në Bushat Kristina Ndoja duke thënë se kjo e fundit ka dhënë dorëheqjen si kandidate për këshillin bashkiak të Vaut të Dejës dhe e ka paraqitur atë në KQZ. Ky reagim i PS Vau i Dejës vjen si kundërpërgjigje pas deklaratave dhe pretendimeve të PD lidhur me zgjedhjet e 30 qershorit në atë bashki ku fitues u shpall Mark Babani i PS, i vetëm në atë garë.
Teksa zgjedhjet e 30 Qershorit në Bashkinë e Vaut të Dejës po kthehen në mollë sherri mes Partisë Demokratike dhe asaj Socialiste, ka reaguar edhe avokati për çështjet zgjedhore Jordan Daci, i cili dëshmon faktin se ka prova se materialet zgjedhore mbërritën në doganë në orën 7:59 min.
Daci shkon me tej teksa denoncon dhe praninë si anëtar në KZAZ-n e Vaut të Dejës të një prej kandidatëve të PS për këshillin bashkiak.
Por përkundër kësaj Partia Socialiste në Vaun e Dejës përmes sekretarit për marrëdhëniet me publikun, Agron Ceka i konsideron qesharake deklaratat e PD duke thënë se materialet zgjedhore në KZAZ 6 mbërritën nga KQZ rreth mesnatës në prani dhe te vëzhguesve të OSBE/ODIHR.
Përkundër deklaratave dhe kundërdeklaratave nga dy forcat politike, bashkia e Vaut të Dejës është bashkia e vetme ne vend që nuk ka kryetar pas shkarkimit të kryebashkiakut Zef Hila.
