Ndeshja mes Washington dhe Houston në NBA do të mbahet mend gjatë, në një sfidë ku u shënuan 317 pikë në total pa shtesë dhe në fund fiton Houston me një pikë diferencë, 159-158.
James Harden realizoi 59 pikë për teksanët, një rekord sezonal. Ndërsa për Washington u dallua Beal, që e mbylli me 46 pikë. Te Houston u dallua edhe Westbrook, që realizoi një “triple double” (17 pikë, 10 rebound e 12 asist).
Humbja e tretë radhazi sezonale për Golden State, që u mund 121-110 nga Phoenix, me Booker që realizoi 31 pikë për miqtë. Për Warriors u dallua Eric Paschall që realizoi 20 pikë, por që mbetën për statistikë. Zhgënjen Curry, që realizoi vetëm 9 pikë.
Fiton skuadra kampione e Torontos, që mundi 125-113 Detroit, ndeshje e dominuar nga vendasit. Siakam realizoi 30 pikë, duke qenë më i miri në fushë për kanadezët. Moment jo i mirë për Oklahomën, që u mund 102-99 nga Portland, sfidë ku herë udhëhiqte njëri ekip e herë tjetri.
Humbet sërish skuadra e Clippers, që u mund 110-96 nga Utah Jazz. Mungesa e Leonard u ndje te Clippers, ndërsa për Jazz u dalluan Conley me 29 pikë e Mitchell me 24.
