Kosova do të luajë sonte në Çeki dhe më 17 nëntor pret Anglinë, në kuadër të fushatës kualifikuese Euro 2020. Dardanët kanë shanse për Europianin, por për UEFA-n do të ishte hall më vete nëse vitin tjetër luan në Euro 2020.
Kampionati Evropian i vitit të ardhshëm do të jetë i veçantë, pasi për herë të parë në histori turneu do të zhvillohet në 12 vende evropiane dhe do të marrin pjesë 24 Kombëtare.
Edhe pse Kosova është e pavarur prej afro 12 vitesh, 79 shtete, përfshirë këtu Spanjën, Rusinë, Azerbajxhanin, Rumaninë, nuk e njohin pavarësinë e saj.
Në disa prej këtyre vendeve do të zhvillohet Euro 2020. Nëse Kosova e arrin kualifikimin dhe caktohet në një grup, ndeshjet e së cilit do të zhvillohet në një vend që s’e njeh pavarësinë e Kosovës, ndeshjet do të duhet të zhvendosen në një vend neutral.
Për shkak të kësaj, Kampionati Evropian U-17 në shkurt, që ishte planifikuar të mbahet në Spanjë dhe Kosova ishte pjesëmarrëse, u zhvendos në Zvicër.
Edhe vetë shorti i 30 nëntorit në Bukuresht të Rumanisë mund të jetë i çuditshëm. Kosova nuk duhet të jetë në grup me Serbinë, Bosnjën apo Rusinë, për shkak se një gjë e tillë nuk lejohet nga UEFA.
Kujtojmë që Kosova, edhe nëse nuk kualifikohet në këtë fushatë, ka një shans tjetër në muajin mars të vitit të ardhshëm, përmes Ligës së Kombeve.
VAZHDO TË LEXOSH MË TEPËR PËR TEMËN
“Për në Europian, nuk mjafton vetëm shpirti”
