Kreu i PD, Lulzim Basha shprehu mirënjohjen ndaj të rinjve që vullnetarisht po japin ndihmën e tyre për banorët e prekur nga tërmeti në Kurbin.
Basha tha se ky 8 dhjetor na bën krenarë për rininë duke shprehur mirënjohjen e thellë ndaj tyre.
“Ky 8 dhjetor, Dita e Rinisë na bën krenarë për rininë tonë. 29 vite më parë të rinjtë u ngritën të parët në Lëvizjen e Dhjetorit që solli demokracinë; sot pas tragjedisë që goditi vendin, të rinjtë ishin të parët që u erdhën në ndihmë njerëzve dhe të parët që nisën mbledhjen dhe shpërndarjen e ndihmave.
Këtë 8 dhjetor shpreh mirënjohjen time të thellë për të gjithë të rinjtë që në këto ditë sprovash dhe dhimbjesh u shndërruan në shpresë dhe forcë për çdo shqiptar. Edhe dita e sotme i gjeti të rinjtë duke ndihmuar qindra familje të dëmtuara nga tërmeti në zonën e Kurbinit”– tha Basha.
Kreu i opozitës shtoi se të rinjtë po u zbusin dhimbjen e banorëve të harruar nga shteti. Por shtoi se ky angazhim dhe solidaritet i të rinjve është drita e shpresës që po ndriçon Shqipërinë për të nxjerrë vendin nga mjerimi dhe çliruar nga kthetrat e korrupsionit.
“Dhimbja e këtyre banorëve të cilët shteti i ka harruar dhe braktisur, është zbutur nga të rinjtë që u vijnë në ndihmë duke vendosur gjithcka në dispozicion të të dëmtuarve. Kjo tragjedi zhveshi nga propaganda gjendjen e vërtetë të vendit, të Shqipërisë së varfër, të vjedhur dhe abuzuar.
Por sot ky angazhim dhe solidaritet i të rinjve është drita e shpresës që po ndriçon Shqipërinë, është frymëzimi ynë që ta kalojmë si një familje e madhe këtë situatë të rëndë sot e ta nxjerrim së shpejti Shqipërinë nga mjerimi, ta çlirojmë nga kthetrat e korrupsionit që nuk kursen as jetën e qytetarëve e ta bëjmë realitet thirrjen që të rinjtë nisën 29 vjet më parë, Shqipërinë si gjithë Europa.
Nderim përjetë heronjve të 8 dhjetorit 1990 me në krye Azem Hajdarin që u ngritën mbi frikën dhe me kurajo e vizion diktuan rënien e diktaturës dhe lindjen e demokracisë shqiptare. Mirënjohje për çdo të ri që në këto ditë te errëta për vendin, ka ndezur dritën e shpresës dhe solidaritetit kombëtar. Zoti e bekoftë rininë shqiptare dhe Zoti e bekoftë Shqipërinë!”– përfundoi Basha.
VAZHDO TË LEXOSH MË TEPËR PËR TEMËN
Konferenca e investitorëve myslimanë
Veliaj: Jo më zi, qendra rinore te tre lagjet për të prekurit
