Dy ndeshje radhazi pa gol dhe Real Madrid tashmë humb pak terren me Barcelonën kryesuese. Los Blancos, pas barazimit 0-0 në “El Clasico”, kanë regjistruar të njëjtin rezultat në shtëpi ndaj Athletic Bilbao.
Skuadra e Zidane ka dominuar ndeshjen duke krijuar raste të panumërta, por fati nuk ka qenë me kryeqytetasit këtë mbrëmje. Reali ishte ekipi më i mirë në pjesën e parë duke krijuar mundësi pas mundësie shënimi, por pa sukses.
Treshja e sulmit Vinicius-Rodrygo-Benzema kanë shpërdoruar disa mundësi të mira teksa Toni Kroos ka goditur traversën. Vendasit kanë dominuar takimin edhe pas pushimit, por sërish fati nuk ka qenë me ta teksa Jovic është ndalur nga shtylla.
Bilbao ka qëndruar shumë mbrapa duke u munduar të rrezikojë me kundërsulme, por prapavija e Realit ka qenë vigjilente gjatë gjithë kohës.
