Presidenti i Republikës, Ilir Meta, ka takuar ushtarakët izraelitë, që ndihmuan Shqipërinë pas tërmetit tragjik të 26 nëntorit.
Në një postim në faqen zyrtare në “Facebook”, Forcat Izraelite të Mbrojtjes kanë publikuar disa foto të takimit të Metës me ushtarakët.
“Ndërsa udhëheqësit botërorë mblidhen në Jeruzalem për Forumin Botëror të Holokaustit, Presidenti i Shqipërisë, Ilir Meta, mori një moment për tu takuar dhe falënderuar ekipin e ushtarëve të IDF që erdhën në ndihmë të kombit të tij pas një tërmeti vdekjeprurës të goditur në nëntor të vitit të kaluar”, thuhet në mesazhin e Forcave Izraelite.
Me këtë rast, Presidenti i Republikës vlerësoi Njësinë izraelite të Shpëtimit Kombëtar me “Dekoratën e Artë të Shqiponjës” duke shprehur mirënjohjen shtetërore, por edhe në emër të qytetarëve shqiptarë për ndihmesën e jashtëzakonshme dhe profesionalizmin e lartë gjatë operacioneve të kërkim-shpëtimit.
